Засгийн газар хуралдаж өндөржүүлсэн бэлэн байдлын үед эдийн засгаа дэмжих зорилгоор хэрэгжүүлэх арга хэмжээний тухай тогтоол гаргалаа. Энэ талаар Сангийн сайд Ч.Хүрэлбаатар, Монголбанкны Ерөнхийлөгч Б.Лхагвасүрэн  нар мэдээлэл өглөө.

Сангийн сайд Ч.Хүрэлбаатар " Өндөржүүлсэн бэлэн байдлын үед авч хэрэгжүүлэх хэд хэдэн арга хэмжээний тухай Засгийн газрын хуралдаанаар хэлэлцлээ. Эдийн засгаа дэмжих үүднээс эрүүл ахуй, ариун цэврийн шаардлага ханган нүүрс, газрын тосны экспортыг эхлүүлнэ. Гэхдээ хилээр гараад  өдөртөө буцаж орж ирсэн байх зэрэг шаардлага тавьж байгаа. 

Түрээсийн татварыг чөлөөлснөөр төсөв дээр ачаалал ирнэ гэдгийг тооцоолсон. Түрээсийн төлбөрөө буулгасан түрээслэгч нарт болон НДШимтгэлийн алданги, торгуулийг чөлөөлөх хуулийн төслийг хаврын чуулганаар хэлэлцэх эсэхийг УИХ шийднэ" гэв.

Монголбанкны ерөнхийлөгч Б.Лхагвасүрэн "Хэрэглээний зээл дээр санал гомдол ирж байна. Зээлийн бүтцийн өөрчлөлт хийж болдог. Эдийн засгийн өнөөгийн нөхцөл байдлаас болоод асуудал үүсэж байвал хугацааны хувьд сунгах боломж нь бий. Төв банк арилжааны банкны үйл ажиллагаанд оролцох боломжгүй. Зээлийн хүүг бууруулвал хадгаламжийн хүүг мөн бууруулна гэсэн зарчимтай. Төрөөс зээлийн хүүг бууруулах, түр царцаах зохицуулалт хийх боломжгүй. Харин банкууд ийм зохицуулалтыг хийж болно" гэсэн юм.