Эрүүл мэндийн яамнаас шинэ төрлийн коронавирусийн нөхцөл байдлын талаар мэдээлэл хийлээ.
ЭМЯ-ны хэлтсийн дарга Д.Нарангэрэл: "Өнөөдрийн байдлаар Жаргалантын аман дахь ОБЕГ-ын харьяа давтан сургалтын төвд нийт 41 хүнийг ажиглалтад байлгаж байна. Харин сэжигтэй тохиолдлуудыг ХӨСҮТ-д тусгаарлаж, ажиглалтад авах шаардлагатай бол ОБЕГ-ын харьяа давтан сургалтын төв, Ачтан мед эмнэлэг гэх мэт эмнэлгүүдэд хуваарлаж байна" гэв.
ХӨСҮТ-ийн захирал Д.Нямхүү: "Хоёрдугаар сарын 26-ны өдөр ХӨСҮТ-д хоёр, Налайх дүүрэгт нэг, Орхон аймагт тусгаарласан нэг нийт дөрвөн сэжигтэй тохиолдлоос халдвар илрээгүй. 27-нд ХӨСҮТ-д нэг, Дорнод аймагт нэг, нийт таван хүнийг тусгаарлалтад авсан шинжилгээ хийгдэж байна. Өчигдөр Япон улсаас 2,000 оношлуур хүлээн авсан" гэлээ.
Хэвлэлийн мэдээллийн үеэр иргэн Д.Доржпүрэв Эрүүл мэндийн яаманд 20 сая төгрөг хандивлалаа.
Дэлхий нийтийг түгшээж буй, аюулт вирусийн халдвараас урьдчилан сэргийлж, өндөржүүлсэн бэлэн байдалд ажиллаж буй эрүүл мэнд, мэргэжлийн хяналт, онцгой байдал, цагдаагийн алба хаагчид халуун цэгт цаг наргүй ажилласаар байгаа билээ.
Коронавирусийн халдвараас урьдчилан сэргийлж, нийгмийн эрүүл мэндийн төлөө ажллаж буй алба хаагчдын аюулгүй байдлыг хангах хувцас хэрэглэлд уг хандивыг өгч байгаа аж.
Халдварын эрсдэлээс сэргийлэхэд зориулж иргэд сайн дураараа нэгдэн, хандив өргөсөөр байна.