Нийслэлийн Налайх дүүрэгт хэсэгчилсэн хөл хорио тогтоогоод байгаа тухай тус дүүргийн Засаг даргын тамгын газраас мэдээлжээ.

Тус дүүрэгт “COVID-19” сэжигтэй тохиолдол бүртгэгдсэн бөгөөд уг иргэн энэ сарын 22-ны өдөр БНСУ-аас ирсэн байна. Түүний хоолой өвдөж, эмнэлэгт хандсанаар дүүргийн Эрүүл мэндийн төвөөс яаралтай тусгаарлан, шинжилгээ авч ХӨСҮТ-д илгээсэн байна.
Тухайн иргэн ирсэн өдрөө Налайх дүүргийн 8 дугаар хороонд байдаг эгчийнхээрээ орсон байна. Тиймээс тус айлд зочилж ирсэн 4 айлыг тандалт судалгаагаар илрүүлэн хэсэгчилсэн хөл хорио тогтоож, зөвлөмж өгч ариутгал хийжээ.

Одоогоор хөл хорио тогтоосон айл өрхийн гишүүдэд ямар нэгэн өвчний шинж тэмдэг илрээгүй байна.
Коронавирусийн халдвараас урьдчилан сэргийлэх зорилгоор зарим айл өрх, байранд яаралтай хөл хорио тогтоосон гэдгийг иргэд зөвөөр ойлгож, хуурамч мэдээлэлд автахгүй байхыг дүүргийн ЗДТГ-аас анхааруулж байна. Мөн онцын шаардлагагүй бол гэрээсээ гарахгүй байх, амны хаалтаа тогтмол зүүх, гараа маш сайн угааж, ариутгахыг уриаллаа.