УИХ дахь Ардчилсан намын зөвлөлөөс өнөөдөр мэдээлэл хийлээ. 2019-2020 оны намрын чуулган өндөрлөсөнтэй холбоотойгоор намрын чуулганы үр дүнг танилцуулсан бөгөөд улс эх орны эдийн засагтай холбоотой гол шийдвэрүүдийг гаргаж чадсангүй хэмээн дүгнэлээ.

АН-ын зөвлөлийн дэд дарга Б.Пүрэвдорж: 

2019-2020 оны намрын чуулган тодорхой асуудлыг шийдвэрлэсэн чуулган байсан. Харамсалтай нь эдийн засгийн асуудлаар иргэдэд нааштай үр дүнд хүрч чадсангүй. Үндсэн хуульд оруулсан нэмэлт өөрчлөлтөөр бид 30 гаруй санал гаргаж, 10 гаруй санал дэмжигдсэн. Ерөнхийлөгчийг УИХ-аас томилох, Засгийн газрын өрийн хэмжээг УИХ-аар тогтоож байх, УИХ-ын гишүүнийг эгүүлэн татах асуудлыг тавьсан ч харамсалтай нь хүлээж аваагүй.

УИХ-ын тойрог, мандатын тухай хууль дээр хатуу байр суурьтай байсан. Монгол Улсын 46 хувь нь амьдарч байгаа нийслэл хотын мандатын тоог бууруулахгүй байх байр суурь барьсан. Харамсалтай нь нийслэлийн мандатын тоог багасгасан. Үүний баталгаажуулалт нь 2020 оны төсвийн тухай хуулиар нийслэлийн хөрөнгө оруулалтыг эрс танасан. 600 орчим тэрбум төгрөгийг Улаанбаатар хотын хөрөнгө оруулалтаас татсан. МАН ирэх сонгуулиар нийслэлээс санал авахгүй гэдгээ тооцоолсон учраас нийслэлийн хөрөнгө оруулалтыг орон нутаг руу татсан. Өөрсдийн сонгогдох боломжтой, ашигтай гэж үзсэн тойргууд руугаа хөрөнгө оруулалтыг татсан.

"Саарал жагсаалт"-д Монгол Улс орсон. УИХ-ын гишүүд хариуцлага хүлээдэггүй зарчмаараа үлдсэн. Өнөөдөр ам.долларын гүйлгээ нэг улсын хяналтад орсон. Валют, ам.долларын гүйлгээ БНХАУ-ын нэр бүхий хоёрхон банкаар дамжиж байгаа нь харамсалтай асуудал. Энэ нь бизнесийн нууцлал алдагдах нөхцөл бий болсон учраас саарал жагсаалтаас гарах асуудлыг яаралтай хийх ёстой. Намрын чуулганаар хэд хэдэн хууль оруулж ирж, батлах байсан ч санаатайгаар унагасан гэж үзэж байна. Тиймээс эрх баригчдад саарал жагсаалтаас гарах сонирхолгүй байна.

Эрх баригч нам ЖДҮ, 60 тэрбумаараа хоёр хуваагдсан, УИХ-ын нэр хүндийг байж болох хамгийн доод түвшинд аваачсан, гэмт хэрэгт холбогдсон асуудал олон бий. Тиймээс УИХ өөрөө тарах талаар Ерөнхийлөгчийн уриалгыг хүлээн авч, УИХ тарах ёстой байсан ч энэ асуудлыг мөн хэлэлцээгүй" гэв.

Мэдээллийн дараа сэтгүүлчдийн асуултад хариуллаа.

-Танай зөвлөлийн дарга Д.Эрдэнэбат болон таны казино тоглож байгаа зураг, бичлэг гараад байна. Та тайлбар өгөх үү?

-Д.Эрдэнэбат дарга хөдөө орон нутагт ажиллаж байгаа, түүний өмнөөс би тайлбар хийх боломжгүй. Миний тоглож буй зураг бол эртний зураг. Гэр бүлийхэнтэйгээ амралтаараа гадаадад явж байхад буудлаас 50 долларын ваучер өгсөн, түүгээр тоглосон. Тэр үед хуульд хориглосон заалт байгаагүй. Төрийн албаны хуульд өөрчлөлт орж, казино тоглохыг хориглосноос хойш би тоглоогүй. Би хуулиа сахидаг хүн. Төсвийн олон тэрбум төгрөгөөр казино тоглосон хүмүүс бий. Казиног хождоггүй юм, тиймээс монголчууд казино тоглох хэрэггүй.

-Ардчилсан намын удирдлагууд Хятад улсад айлчилж, санхүүжилт босгох гэж байна гэх яриа гараад байна?

-АН-ын удирдлагууд БНХАУ-д айлчилсан. Монгол Улсын эдийн засагт ач холбогдолтой улс бол хоёр хөрш. Ялангуяа Хятад улстай сайн харилцаатай байх нь нийгэм, эдийн засагт маш чухал. АН аливаа нэг улс орон томоохон аж ахуй нэгж, олигархиудаас төрийн сонгуульд зориулж мөнгө авахгүй. Гишүүд нь өөрсдөө мөнгө хандивлаад, намынхаа үйл ажиллагааг санхүүжүүлээд явна.

-НДЕГ-ын дарга асан Ц.Уртнасанг цагдан хорьсон, энэ асуудлыг мөн танай намын дарга С.Эрдэнэтэй холбож тайлбарлаад байх шиг байна?

-Нийгмийн даатгалын мөнгийг тухайн жилд нь банктай гэрээ хийж, нэг жилийн хугацаатай байршуулж байсан. НДС-гийн мөнгийг өсгөсөн гэж тухайн үед Ц.Уртнасан даргыг магтаж байсан. Тухайн үед "Капитал" банк Монголбанкны судалгаагаар сайн банкинд хамруулж байсан. Гэтэл үүнээс хойш дөрвөн жил өнгөрчихөөд байхад өөр банкинд байршуулахгүй явсан нь эрх баригчдын буруу. Эрх баригчид Капитал банк дампууруулсан асуудлаа сонгуулиас өмнө дарахын тулд ажлаа өгсөн хүнийг барьж хорьсон. Энэ бол цэвэр улс төрийн зорилготой.

-Долоон хүн гэдэг хэцүү, цөөн юм. Улс төрийн урт үед бүх зүйл дээр гал тавиад байх нь үнэ хүндээ алдана. МАН маш их алдаа хийсэн. МАН-ын "ЖДҮ", "60 тэрбум" гэж хоёр хуваагддаг. Бид том асуудлыг нь шийддэг. Ж.Эрдэнэбатын Засгийн газрыг огцруулж өгсөн нь, У.Хүрэлсүхийн Засгийн газрыг байгуулж өгсөн нь, сая Н.Номтойбаярыг түдгэлзүүлэх шийдвэр гаргаж өгсөн  нь АН-ын зөвлөл. Том асуудлыг шийддэг нь АН-ын зөвлөл гэж ойлгож болно

-Ардчилсан намын зөвлөл хэр сайн сөрөг хүчин байж чадсан бэ?

--Долоон хүнтэй сөрөг хүчин гэдэг хэцүү. Нөгөө талаас улс төрийн урт үед бүх зүйл дээр гал тавиад байх нь үнэ хүндээ алдана. МАН-ын бүлэг "ЖДҮ", "60 тэрбум"-аараа хуваагддаг. Бид том асуудлыг нь шийддэг. Ж.Эрдэнэбатын Засгийн газрыг огцруулж өгсөн нь, У.Хүрэлсүхийн Засгийн газрыг байгуулж өгсөн нь, сая Н.Номтойбаярыг түдгэлзүүлэх шийдвэр гаргаж өгсөн нь АН-ын зөвлөл. Том асуудлыг шийддэг нь АН-ын зөвлөл гэж ойлгож болно. МАН маш их алдаа хийсэн. Гэвч алдаа болгон дээр дөрөөлж, шархыг сэдрээх боломж бага байлаа. Гэхдээ бид сөрөг хүчнийхээ үүргийг хангалттай биелүүлсэн.