Эрүүл мэндийн яамнаас мэдээлэл хийх үеэрээ амралтын өдрүүдэд бүртгэгдсэн сэжигтэй тохиолдлуудын шинжилгээний хариуны талаар ХӨСҮТ-ийн Ерөнхий захирал Д.Нямхүү мэдээллээ.
Д.Нямхүү: "Амралтын өдрүүдэд нийт гурван тохиолдлыг тусгаарлагдаж хяналтанд авсан. 2020 оны хоёрдугаар сарын 8-нд Өвөрхангай аймгийн нэгдсэн эмнэлэгт тусгаарлагдсан хүний тусгай шинжилгээний хариу сөрөг буюу коронавирус илрээгүй. Харин А хүрээний H3N2 вирус илэрсэн.
Хоёрдугаар сарын 8-нд тусгаарлагдсан Сөүл-Улаанбаатарын онгоцоор ирсэн иргэний шинжилгээний хариу сөрөг мөн гарсан. Мөн хоёрдугаар сарын 9-нд Хөх хот-Улаанбаатар чиглэлээр ирж тусгаарлагдсан сэжигтэй иргэний шинжилгээний хариу сөрөг гарч, А хүрээний H3N2 вирус илэрсэн лабораторийн дүгнэлт гарсан.
Одоогийн байдлаар ХӨСҮТ дээр хянагдаж байгаа Уханиас ирсэн оюутнууд болон нэмэгдэж ирсэн хүмүүсээс шинжилгээ авч, зөвлөгөө өгөөд гаргаж байгаа. Бид илүү хариуцлагатай, анхаарлаа сулруулахгүй байх чухал үе ирээд байна. Цагаан сарыг нийтээр тэмдэглэхгүй байх шийдвэр хурдан гарвал бидэнд хэрэгтэй. Хятад улс цагаан сараа хийсэн нь алдаа болсон гэдгийг тэд бас хүлээн зөвшөөрөөд байгаа” гэв.
