Манай улстай хиллэдэг БНХАУ-ын Эрээн хотын Халдварт өвчнөөс урьдчилан сэргийлэх штабаас тус хотод нэгдүгээр зэргийн хөл хорио өчигдөр орой зарлажээ. Зарлан мэдээлэх хуудаст дараах дөрвөн шаардлагыг тусгасан байна. 

Тодруулбал, "Нэгдүгээрт, шинэ коронавирусний тархалт ихтэй газраас Эрээн хот руу ирэхийг төлөвлөж байгаа иргэд тархалт зогсохоос өмнө ирэхгүй байхыг сануулж байна. Үүнийг зөрчсөн иргэнийг албадан буцаах, эсвэл тусгаарлах газарт 14 хоног хөл хорионд байлгах бөгөөд гарах зардлыг тухайн иргэн өөрөө даана.

Хоёрдугаарт, Вирусийн эрсдэл ихтэй газраас хэдийн ирсэн иргэд гэртээ 14 хоног байх бөгөөд дураараа гадагш гарч үл болно. 

Гуравдугаарт, Олон нийтийн аюулгүй байдлыг хангах товчоо иргэдэд энэхүү зарлан мэдээлэх хуудсыг WeChat болон бусад сувгаар шуурхай хүргэж мэдээлэх үүрэгтэй. 

Дөрөвдүгээрт, цагдаагийн газар, хороодын хариуцлагатай ажилчид нэгэнт Эрээн хотод ирсэн хүмүүсийг гэрээс нь гаргахгүй байхыг хянаж ажиллахыг үүрэгдэв" гэжээ. 

БНХАУ-ын ӨМӨЗО-д шинэ коронавирусийн халдварын сэжигтэй 1533 иргэн эмнэлгийн хяналтад байна. Коронавирусаар өвчилсөн нь тогтоогдсон  54 тохиолдол бүртгэгджээ. 

Тухайлбал, Ордос хотод 11, Баотоу хотод 10, Хөххотод 7, Баяннуурт 6, Хөлөнбуйрт 5 тохиолдол бүртгэгджээ.

БНХАУ-ын 31 мужид шинэ коронавирусын халдварт хатгалгаагаар өвчилсөн тохиолдол 37251-т хүрч биеийн байдал хүнд 6188, нас барсан 812, бүрэн эдгэрсэн 2651 хүн байна.

Дашрамд дурдахад, Манай улсад шинэ коронавирусийн халдварын тохиолдол илрээгүй ч Монгол Улсын Засгийн газраас монгол иргэнийг БНХАУ руу зорчихыг гуравдугаар сарын 2 хүртэл хязгаарласан. Тус улс руу албан ажлын зайлшгүй шаардлагаар зорчих тохиолдолд Улсын онцгой комиисын даргын зөвшөөрлөөр улсын хилээр гарна. Харин улс хоорондын ачаа тээвэрт уг хязгаарлалт хамаарахгүй юм. Энэ хугацаанд Монгол Улсын иргэн зөвхөн Буянт-Ухаа, Замын-Үүд боомтоор эх орондоо хил нэвтрэх юм.