Коронавирусийн эрсдэлтэй үед шүлс, нус цэр аюултай “зэвсэг” болоод байгаа. Харин хотын гудамж, автобусны буудал орчмын газрууд эдгээр хаягдлын бай болсон. Хэрэв автобусны буудал болон автобусанд коронавирусийн халдвараас хэрхэн сэргийлэх талаар зөвлөгөө, санамж байрлуулбал жинхэнэ зорилтот хэсэгтээ хүрэх юм.

Түүгээр ч барахгүй нус, цэрээ сальфетка ашиглан хогийн саванд хаях тухай сануулж, бичиг үсэггүй нэгэнд нь хараад ойлгохоор зураг дүрслэл ашиглавал бүүр ч догь. Автобусны буудал дээр зогсч байгаа хүмүүс мөн Тамхины хяналтын тухай хууль зөрчигчдийн гэрч болдог. 

Уг хуулиар автобусны буудал дээр тамхи татахыг хориглодог ч ийм хуулийн заалт, торгууль байдгийг сонсч дуулаагүй хүмүүс хээв нэг тамхи татаж зогсдог. Тэдэнд зориулсан санамж байрлуулбал ТҮК-ийнхны ачаалал багасна даа. Тэд тамхины иш цэвэрлэхэд багагүй цагаа зарцуулдаг. Уг нь энд дурдсан үйлдлүүд бүгд хуулиар хориглосон, бүр торгох шийтгэлтэй шүү дээ. Түүнийг мэддэг нь цөөн, мэдэхгүй нэгэндээ хэлж таниулах ажил ч муу явах юм даа.

Зүй нь Зөрчлийн тухай хуулинд 5.1 дүгээр зүйл. "Олон нийтийн газарт зүй бусаар биеэ авч явах" гэсэн заалт бий. "Олон нийтийн газар, авто зам, орон сууцны орчны газар, гудамж, талбайд бие зассан, эсвэл нус, цэр, тамхины иш, хог хаясан бол хүнийг арван нэгжтэй тэнцэх хэмжээний төгрөгөөр торгоно" гэж заасан. Энэ заалтыг автобусны буудал дээр нүдэнд тусахуйц газар "зоочихвол" нийслэлчүүдийн эрүүл мэндэд тустай юм сан.

Хууль зөрчигчдийг хэнд "ховлож", хэн торгох нь иргэдэд тодорхойгүй байгаа. Энэ төрлийн зөрчилд арга хэмжээ авсан бол бага гэж гололгүй мэдээлж байвал бусдад нь сануулга, сэрэмж болох юм. Хэрэв автобусны буудлын орчимд камер суурилуулбал тамхичин, нус, цэрээ хаягчдыг нүүр царайгаар нь таних программаар олж илрүүлээд торгууль ногдуулах байсан даа. Одоохондоо ийм боломж байхгүй бол ядаж хэлж сануулж байя. "Хүн хэдий сайн ч хэлэхээс нааш санахгүй" гэдэг дээ.

"Ардчилал тайм" сонин