"Ноёд” группийн захирал Г.Буяндорж прокуроруудын хууль бус үйлдлийг илчилж, шударгаар шүүхийг хүсэн Монгол улсын ерөнхийлөгчид хандлаа. Тэрээр нотлох баримт бүхий 65 хуудас материалыг Ерөнхийлөгчийн тамгын газрын дарга З.Энхболдод хүлээлгэн өгөв. 

Г.Буяндорж: "Манай "Ноёд” группийн охин компани болох "Ноёд констракшн" коипанийг хуулийн байгууллагын нэр бүхий хүмүүс зохион байгуулалттайгаар дээрэмдэж авсан. Надаас 100 мянган ам.доллар нэхэж, өгөөгүйнх нь төлөө цагдан хорьсон. Сүүлийн 9 жилийн хугацаанд хуулийн байгууллагаар шалгагдаж, 409 хоног цагдан хоригдсон. Үүнээс болж, 25 тэрбум төгрөгийн хохирол учирсан. 

БЗД-ийг ерөнхий прокурор хийж байгаа Ц.Батболд, прокурор Н.Сандагсүрэн, прокурор Н.Халиун нар оролцсон. Би Н.Халиуны гэр бүлийн өмгөөлөгчтэй 100 мянган долларын гэрээ хийсэн. Дараа нь өгөх боломжгүй гэхэд намайг эрүүгийн хуулийн таван зүйл ангиар эрүү үүсгэж, 1.2 жил цагдан хорьсон. Тэдний ард мөрдөн байцаагч, шүүх зэрэг зохион байгуулалттайгаар албаны хүмүүс оролцсон" гэлээ.

Мөн тэрээр шударга ёсны тэмцлээ эхлүүлж байгаа гэдгээ мэдэгдэж, дараа өдөр цаг товлож уг хэргийн талаар дэлгэрэнгүй мэдээлэл хийнэ, шат шатны хуулийн байгууллагад хандсан ч шийдэлд хүрч чадаагүй тул эцсийн байдлаар монгол улсын иргэний хувьд ерөнхийлөгчид хандсан гэсэн юм.