Дэлхий нийтээр аюулын харанга дэлдсэн шинэ коронавирусын халдварын улмаас улс орнууд амны хаалтны хомсдолд ороод байна. Манай улсын гол нийлүүлэгч болох Хятад улс өөрсдөө дотоодынхоо хэрэгцээг хангаж чадахгүйд хүрсэн тул Эрүүл мэндийн яам Турк улсаас амны хаалт оруулж ирэхээр болсон тухай мэдээлсэн. Нийслэлийн эмнэлгүүд болон эмийн сангуудаар амны хаалт тасарч, үнэ тогтохоо болиод удаж байна.

Үүний улмаас орон нутагт өөрсдийн хүч, бололцоогоор амны хаалт үйлдвэрлэж эхлээд байна. Тухайлбал, Хөвсгөл аймагт тасралтгүй арав гаруй жил оёдлын чиглэлээр үйл ажиллагаа явуулж байгаа "Хөвсгөл иргэн" компани орон нутагтаа "Хөвсгөл Monline" спорт хувцасны үйлдвэрийг байгуулаад гурав дахь жилдээ ажиллаж байгаа юм байна.

Тус үйлдвэрийн хамт олон орон нутагт амны хаалтны нөөц дуусч, сүүлийн үед үнэ хэт их хөөрөгдөж байгаа энэ үед чанартай материалаар амны хаалт үйлдвэрлэж эхэлсэн байна. Амны хаалт нь эрүүл ахуйн шаардлага хангасан байх шаардлагатай учраас өнгө алдахгүй, будаг гарахгүй, хүний биед харшил нөлөө үзүүлэхгүй эрүүл ахуйн шаардлага хангасан материалаар үйлдвэрлэж байгаа аж.  

Үйлдвэрийн хамт олон өдөрт 400 ширхэгийг үйлдвэрлэж, эрэлт ч ихтэй байгаа аж. Амны хаалтыг нэг ширхэгийг 800 төгрөгөөр худалдаалж байгаа, ашгийн төлөө бус,  нийгмийн хариуцлагаа ухамсарлан иргэдийн хэрэглээг хангах зорилготой. Мөн зорилтот бүлгийн хүүхдүүдэд үнэгүй өгч байгаа гэдгийг "Хөвсгөл иргэн" компанийн захирал Д.Отгондулам хэлж байна.