Жендэрийн үндэсний хорооны ээлжит хуралдаанаар 2020 оны ажлын төлөвлөгөөгөө батлав.

Энэ онд нийт 88 ажил хэрэгжүүлэхээр төлөвлөсөн байна. Үүнд:

- Сангийн яам жендэрийн мэдрэмжтэй төсөвлөлтийн аргачлал боловсруулж батлах, бүх түвшинд нэвтрүүлэх

- Хорооны гишүүд тоо бүртгэл, хяналт-шинжилгээ, үнэлгээ, тайлагналтаа хянаж, хүйсээр ялгасан тоон мэдээ, чанарын шалгуур, үзүүлэлтүүдийг тусгах

- Эрэгтэй, эмэгтэй хүмүүсийн наслалтын зөрүү 10 жил байгаад онцгой анхаарч, тодорхой бодлого гарган ажиллах

- ХНХЯ, МҮЭХ, Хараат бус судалгааны хүрээлэн хамтран Ажил-амьдралын тэнцвэрийг хангах бодлого, хөтөлбөр боловсруулж хэрэгжүүлэх, энэ чиглэлээр гадаадын туршлагыг судлах, загварчлал түгээх

- Ажлын байран дахь хүчирхийлэл, ажлын байрны бэлгийн дарамтаас урьдчилан сэргийлэх асуудлыг Хөдөлмөрийн тухай хуулийн шинэчилсэн найруулгад тусгах

- Төрийн албан хаагчдын жендэрийн талаархи ойлголт, мэдлэгийг нэмэх зэргийг Монгол Улсын Ерөнхий сайд, Жендэрийн үндэсний хорооны дарга У.Хүрэлсүх үүрэг болгов.

Мөн хурлаар “Эрэгтэй, эмэгтэй хүмүүсийн дундаж наслалтын зөрүү, түүнд нөлөөлж байгаа хүчин зүйлс”, Жендэрийн эрх тэгш байдлыг хангах тухай хуулийн хэрэгжилтийг эрчимжүүлэх, аймаг, орон нутгийн сайн туршлагыг нэвтрүүлэх зэргийг хэлэлцэн тогтоол гаргав. Түүнчлэн ажлаараа тэргүүлсэн Батлан хамгаалах яам, нийслэл, Өвөрхангай аймгийн салбар хороог шагнаж урамшууллаа.