Дөнгөж сая Засгийн газрын ээлжит бус хуралдаан өндөрлөж, Улсын онцгой комиссын дарга, Шадар сайд Ө.Энхтүвшин мэдээлэл хийлээ. 

ДЭМБ-аас гаргасан сүүлийн мэдээгээр шинэ коронавирусын халдвараар 2001 хүн өвчилж 56 хүн нас барсан байна. Дэлхийн 19 оронд энэ өвчний тохиолдол бүртгэгджээ. Монгол Улстай хил залгаа Шинжан  Уйгар, Хөх хотод мөн өвчний тохиолдол бүртгэгдсэн байна.Өнөөдрийн байдлаар Монгол Улсад уг өвчний сэжигтэй тохиолдол илрээгүй боловч Монгол Улс эрсдлийн гурав дахь үнэлгээгээ хийж "Өндөр эрсдэлтэй" орны тоонд багтсан байна.

Тиймээс өнөөдөр хуралдсан Засгийн газрын ээлжит хуралдаанаас ирэх даваа гариг буюу 27-ны өдрөөс эхлэн ЕБС, цэцэрлэг төдийгүй их, дээд сургуулиуд, МСҮТ-үүдийн үйл ажиллагааг зогсоох шийдвэр гаргасан байна.

Шинэ төрлийн коронавирусыг тандан судалж буй эрдэмтэд, судлаачдын зүгээс уг өвчнийг агаар дуслын болон ахуйн замаар халдварладаг гэж тогтоосон тул иргэдийг гараа тогтмол савандаж угаах, маск буюу амны хаалт зүүх, халдвар тарсан орнуудад зорчихгүй байхыг анхааруулж байна.

Мөн Гадаад харилцааны яам, Хил хамгаалах ерөнхий газрын удирдлагуудад энэ сарын 30-ны дотор хил орчмын явган болон автозамын хөдөлгөөнийг хязгаарлах үүргийг Засгийн газраас өгсөн байна. Харин агаарын болон галт тэрэгний хөдөлгөөнд хязгаарлалт тавиагүй байна.

Одоогийн байдлаар БНХАУ-ын Үхань хотод Монголын 31 оюутан байгаа бөгөөд Хятадын талбай харилцаж тэднийг авчирах үүргийг Боловсролын сайдад өгчээ. Энэ ажлыг маргаашийн дотор зохион байгуулна гэв.

Мөн ХӨСҮТ-д 50 ортой дэлхийн стандартад нийцсэн тусгай тасаг байгуулсан, шаардлагатай тохиолдолд 150 ороор нэмэгдүүлэх боломжтой. ХӨСҮТ нь дэлхийн 120 орны ижил түвшний ижил лабораториудтай харьцдаг, дэлхийн түвшинд оношлогоо шинжилгээгээ явуулдаг. Энд 21 төрлийн вирусыг илрүүлэх боломжтой бөгөөд энэ шинжилгээгээр тогтоогдоогүй тохиолдолд "сэжигтэй" буюу шинэ коронавирус байх магадлалтай хэмээн тооцдог юм байна.

Дэлхийн бусад орнууд ч мөн ийм маягаар шинжилж байгаа. Хятад улс өөрийн оношлууртай болсон. Монгол Улсын хувьд ирэх мягмар гариг гэхэд Япон улсаас оношлуур авахаар болсон тухай Эрүүл мэндийн сайд Д.Сарангэрэл мөн мэдээллээ.