Япон улсын Засгийн газрын буцалтгүй тусламжийн "Өвсний үндэс" хөтөлбөрийн хүрээнд Налайх дүүргийн 123 дугаар цэцэрлэгийн өргөтгөлийн төслийг хэрэгжүүлэхээр болжээ.

Энэ сарын 22-ны өдөр Налайх дүүргийн Засаг дарга Ч.Раднаабазар Япон улсаас Монгол Улсад суугаа онц бөгөөд бүрэн эрхт элчин сайд Кобаяши Хироюкитай 123 дугаар цэцэрлэгийн өргөтгөлийн төслийг хэрэгжүүлэх гэрээнд гарын үсэг зурлаа.

Засаг дарга Ч.Раднаабазар: "Юуны өмнө Налайх дүүрэгт хүүхдэд ээлтэй, эрүүл аюулгүй орчин бий болгон, сургалтын орчныг шинэчлэх асуудалд жинтэй хувь нэмрээ оруулан Япон улсын Засгийн газрын буцалтгүй тусламжийн “Өвсний үндэс” хөтөлбөрийн хүрээнд Нийслэлийн Налайх дүүргийн 123 дугаар цэцэрлэгийн өргөтгөлийн төслийг хэрэгжүүлэхэд тусламж дэмжлэг үзүүлж буй Япон улсын Засгийн газар, Япон улсаас Монгол улсад суугаа Элчин сайдын яаманд дүүргийн ард иргэдийн өмнөөс гүнээ талархаж байгаагаа илэрхийлье. Японы Засгийн газраас үзүүлж буй энэхүү буцалтгүй тусламж нь дүүргийн цаашдын ирээдүй болсон сургуулийн өмнөх боловсролын насны хүүхэд багачуудын оюуны хөгжилд оруулж буй чухал хувь нэмэр бодит үр дүн билээ. Бидний хамтын ажиллагаа цаашид тал бүрийн салбарт улам бүр өргөжин дэвжихийн ерөөлийг дэвшүүлж эрүүл энх сайн сайхан бүхнийг дүүргийн ард иргэдийн зүгээс болон хувийн зүгээс хүсэж байна" хэмээн талархлаа илэрхийлсэн юм.

Тус дүүрэгт одоогоор Ерөнхий боловсролын 5 сургууль, сургуулийн өмнөх боловсролын төрийн өмчит 8 цэцэрлэг, төрийн бус 6 цэцэрлэг үйл ажиллагаа явуулж байна. Дүүргийн хэмжээнд цэцэрлэгийн насны 3750 хүүхэд байгаагаас сургуулийн өмнөх боловсролд 2581 хүүхэд хамрагдаж байгаа юм.

123 дугаар цэцэрлэгийн өргөтгөлийн барилгыг энэ оны ёс дүгээр сард ашиглалтад оруулахаар төлөвлөжээ. Өргөтгөл ашиглалтанд орсноор нэмж 50 хүүхдийг сургуулийн өмнөх боловсролд хамруулах боломж бүрдэх юм.