Налайхын шинэ замд жолооч нар хурд хэтрүүлсэн зөрчил цөөнгүй бүртгэгддэж байна. Хэдийгээр цагдаагийн алба хаагчид хяналт тавьж ажиллаж буй ч шөнийн цагаар хурд хэтрүүлэх, осол гаргах зөрчил Тээврийн цагдаагийн албанд бүртгэгдсээр байна.

Тус зам дээр хурд хэмжигчийг байршуулсан ч саяхныг хүртэл хурдны дээд хязгаарыг тогтоогоогүй байсан аж. Тиймээс Налайхын замын хурдны дээд хязгаарыг 80 км/цаг болгож, зөрчил гаргасан жолооч нар хариуцлага тооцохыг Улаанбаатар хотын захирагч С.Амарсайхан холбогдох албан тушаалтнуудад үүрэг болголоо. 

Хэрэв Тээврийн хэрэгслийн хурдыг тогтоосон хязгаараас 50 хүртэлх хувиар хэтрүүлэх юм бол Зөрчлийн тухай хуулийн 14.7.31-т заасны дагуу 50 нэгж буюу 50000 төгрөгийн торгуулийн арга хэмжээ авдаг. Харин 50-иас дээш хувиар хурд хэтрүүлсэн тохиолдолд Зөрчлийн тухай хуулийн 14.7.32-т заасны дагуу жолоочийг 50000 төгрөгөөр торгож, зургаан сар жолоодох эрхийг хасдаг байна. Мөн тус хуульд нэг зөрчлийг тухайн газар дээр нь торгуулийн арга хэмжээ авч шийдвэрлэнэ гэж заасан байдаг.