Энэ оны эхнээс дагаж мөрдөж буй, Нийгмийн даатгалын хуулиудад орсон өөрчлөлтүүдийн талаар өчигдөр НДЕГ-аас мэдээлсэн билээ.
Энд мэдээлэгдсэнээр, Нийгмийн даатгалын сангаас олгох тэтгэвэр, тэтгэмжийн тухай хууль болон Цэргийн албан хаагчийн тэтгэвэр, тэтгэмжийн тухай хуулийн дагуу тэтгэвэр тогтоолгон авч буй нийт тэтгэвэр авагчдын тэтгэврийн хэмжээг 8 хувиар нэмжээ. Үүнд улсын төсвөөс энэ онд 150.6 тэрбум төгрөг зарцуулах юм байна.
Мөн зарим иргэний тэтгэврийг 50 мянган төгрөгөөр нэмэгдүүлсэн байна. Үүнд ямар иргэд хамрагдаж буй талаар НДЕГ-ын дэд дарга Г.Саран дараах мэдээллийг өглөө.
-Өнөөдрийн байдлаар, Нийгмийн даатгалын сангаас нийт 423 мянган тэтгэвэр авагч байгаа. Улсын төсөвт 154 тэрбум төгрөг тусгагдсан байгаа. 2 дугаар сарын 1-нээс өмнө тэтгэврийг 8 хувиар нэмэгдүүлнэ.
Нийгмийн даатгалын тухай хуульд нэг том өөрчлөлт орсон юм. Хуучин БНМАУ-ын Тэтгэврийн тухай 1990 оны хуулиар 1991-1994 оны хооронд 4 үндэслэлээр тэтгэврээ тогтоолгосон иргэд байгаа.
Энд төрүүлсэн болон 3 хүртэл настайд нь үрчлэн авсан 4, түүнээс дээш хүүхдээ 6 настай болтол өсгөсөн, 15-аас доошгүй жил ажиллаж 50 нас хүрсэн эхчүүд, мөн төрүүлсэн болон 3 хүртэл настайд нь үрчлэн авсан 4, түүнээс дээш хүүхдээ 6 настай болтол өсгөсөн, 20-иос доошгүй жил ажиллаж нас харгалзахгүй тэтгэврээ тогтоолгосон эхчүүд, нийтдээ 27-гоос дээш жил ажиллаж, нас харгалзахгүй нөхцөлөөр тогтоолгосон эмэгтэй, нийтдээ 32-оос дээш жил ажиллаж, 55 нас хүрсэн эрэгтэйчүүд хамрагдаж байсан юм.
Дээрх үндэслэлээр тухайн үедээ нийт 44 мянган иргэн тэтгэврээ тогтоолгож байв. Үүнээс одоо 21 мянга нь тэтгэврээ авч байгаа. Дээрх иргэдийн тэтгэврийг энэ нэгдүгээр сарын 20-ноос эхлэн 50 мянган төгрөгөөр нэмэгдүүлж байгаа гэв.
Мөн тэтгэврийг дараалсан 7 жилийн дунджаас буюу 84 сараар бодож тогтоох болжээ. Тухайн иргэн өөрөө ажилласан жилийн болзлыг хангасан, өөрөөр хэлбэл 20 жил 9 сар ажилласан бол 55 болон 60 нас хүрсэн иргэн тэтгэврээ бүрэн тогтоолгох боломжтой юм байна.
Өмнө нь 60 сарын дунджаар тэтгэвэр тогтоодог байхад их өндөр хэмжээгээр 5 жил дараалж төлөөд хэт өндөр хэмжээгээр тэтгэврээ тогтоолгох боломжтой байсан тул хуульд өөрчлөлт оруулснаар Тэтгэврийн даатгалын сангийн ачааллыг тодорхой хэмжээгээр бууруулах, дээрээс нь тэтгэврийг илүү бодитой тогтоолгох үндэслэлийг бий болгож байна гэв.
