Стандарт, хэмжил зүйн газраас угаарын хий мэдрэгч төхөөрөмжийн стандартын талаар мэдээлэл хийлээ.
Монголд гадна орчны агаарын бохирдлыг хэмждэг итгэмжлэгдсэн дөрвөн лаборатори бий. Харин угаарын хий мэдрэгч нь дотоод орчныг хянана, мөн анх удаагаа манай улсад орж ирж байгаа учир туршилтуудыг хийхийн тулд ажлын хэсэг байгуулна гэв.
Хэмжил зүйн газрын дарга Д.Дамбасүрэн:
-Төхөөрөмжүүд ямар түвшнээр хэмжих, ямар стандарттай байх, өрх гэрт аль байрлалд суурилуулах нь тохиромжтой вэ зэргийг ажлын хэсгийн дүгнэлтээр тодорхой болно. Хэрэв төхөөрөмжүүд ирээд манайд туршигдаж, стандартыг батлавал цаашид хүндрэл, ямар нэг асуудал үүсэхгүй.
Туршилтыг хийхдээ лабораторийн орчинд тусгай камер байрлуулж, угаарын хийн янз бүрийн нэгдлүүдийг хэр мэдэрч байгааг хэмжих бөгөөд өнөөдрийн байдлаар туршилт хийх төхөөрөмжийг Стандарт, хэмжил зүйн газарт ирүүлээгүй байна гэв.
Товчоор хэлбэл, өнөөдрийн хэвлэлийн бага хурлыг "Стандарт, хэмжил зүйн газраас стандарт боловсруулахгүй цаг хугацаа алдаж байна" гэх мэдээллийг залруулах зорилгоор хийсэн аж.
Угаарын хий мэдрэгчийн стандартыг боловсруулах төсөлд мэдрэгч төхөөрөмж нь дотоод орчинд угаарын хийн концентраци
-30 ppm болоход 120 минут,
-50 ppm болоход 60 минутын турш түгшүүрийн дохио өгч,
-100 ppm болсон үед 10 минутын турш дохио өгдөг байхаар боловсруулжээ.
Харин ppm нь ямар түвшинд байх нь хүний эрүүл мэндэд хэрхэн нөлөөлөхийг тэд хариулж чадсангүй.
