“Мандал даатгал”, “Ард капитал” компани, Монголын үнэт цаасны арилжаа эрхлэгчдийн холбооноос Монгол Улсын тэтгэврийн тогтолцоонд шинэчлэл хийх зорилгоор “Тэтгэврийн реформын хөдөлгөөн” төрийн бус байгууллага байгуулахаар болсон талаараа өнөөдөр мэдээлэл хийлээ.

"Мандал Даатгал" компанийн үүсгэн байгуулагч, ТУЗ-ийн дарга Ө.Ганзориг: 

-Уг хөдөлгөөнийг улс орон даяар мэргэжлийн хөдөлгөөн болгож, нэн шаардлагатай байгаа Тэтгэврийн реформыг хийж эхлүүлэх зорилготой байна. Энэхүү хөдөлгөөнийг санаачлагчид нь Монгол Улсын тэргүүлэх санхүүч, эдийн засагчид бөгөөд олон жилийн турш төр засагт үнэтэй зөвлөгөө судалгааг хүргүүлж, санал хэлсээр ирсэн хүмүүс юм. Гэхдээ өнөөдөр Монгол Улс тэтгэврийн реформыг эсэргүүцэж байгаа нь манай улсын макро, микро эдийн засагт маш том бүтцийн эдийн засгийг бий болгож байна. Мөн тэтгэврийн реформ хийхгүй бол манай улсад баян, ядуугийн ялгаа хэзээ ч арилахгүй.

Эдийн засагч Ч.Хашчулуун: 

-Өнөөдөр хөдөлмөрийн хөлсний доод хэмжээ 320 мянган төгрөг байна. Олон жил хөдөлмөрлөн, улс орныхоо төлөө залуу насаа зориулсан бүх хүнд эргээд ийм бага хэмжээний тэтгэвэр олгож байгаа нь манай улсын тэтгэврийн тогтолцоо болохгүй байгаагийн шинж гэж мэргэжлийн талаас дүгнэж байна.

Бусад улс оронд тэтгэврийн тодорхой сангууд байгуулж, өрсөлдөөн бий болгон, хувийн хэвшлээр удирдуулдаг тогтолцоо бий болчихсон. Өөрөөр хэлбэл, одоогийн залуучууд тэтгэврийн сандаа мөнгөө хуримтлуулаад явахад тэтгэвэрт гарах үедээ цалингийн хэмжээнээсээ буурахгүй байх хэмжээний тэтгэвэр тогтоолгох боломжтой гэсэн үг. Одоогийн тогтолцоонд харин ийм боломж байхгүй.

"Ард капитал” компанийн Гүйцэтгэх захирал, Монголын үнэт цаасны арилжаа эрхлэгчдийн холбооны Удирдах зөвлөлийн дарга Б.Өлзийбаяр: 

-Сүүлийн үед тэтгэврийн даатгалтай холбоотой олон асуудал яригдаж байна. Үүнээс бид тэтгэврийн реформ хийх зайлшгүй шаардлагатай байгааг харсан. Энэ шаардлага нь улс төрчдийн захиалга биш, ард түмний захиалга гэж бид харж байна. Өнөөдрийн тогтолцоогоор бол, төлсөн нь хохирч, төлөөгүй хүмүүс нь завшдаг болжээ. Иймд тэтгэврийг хуваарилалтын тогтолцоо бус, хуримтлалын тогтолцоо руу оруулах зорилгоор бид нэгдсэн юм. Ард иргэд маань ирээдүйгээ бодоод хөдөлгөөнд нэгдэхийг уриалж байна.

Эдийн засагч Ж.Дэлгэрсайхан: 

-Тэтгэврийн тогтолцоо энэ хэвээрээ цаашид явах боломжгүй болсон. Иймд нийгмийн хөдөлгөөн болгон өрнүүлж, бодлого тодорхойлогчдод нөлөөлж байж, илүү хэрэгцээ шаардлага гарна.

Эдийн засагч, шинжээч Г.Ганзориг: 

-130 жилээр хоцрогдсон систем манай улсад үйлчилж байна. Фэйсбүүкийн "Тэтгэврийн реформ" хөдөлгөөн пэйж хуудсанд нэгдэж, энэхүү шинэчлэлийг хамтдаа хийхийг нийт ард иргэддээ уриалмаар байна. 1990 онд нийт хүн амын 8.3 хувь нь тэтгэврийн насных байсан бол 2018 онд 10.8 хувь болж өссөн байна. Хэрэв энэхүү тренд цаашид үргэлжилсээр байвал Тэтгэврийн даатгалын сангийн алдагдал улам бүр л өснө.

Эдийн засагч Г.Мөнх-Эрдэнэ: 

-Мэргэжлийн хүмүүс нэгдэж энэ асуудлуудыг шийдэхгүй юм бол хэн ч шийдэхгүй гэдгийг ойлголоо. Олон жил хүлээж, саналуудаа хэлж, шийдвэрлүүлэх гэж үзээд болсонгүй гэдгийг манай мэргэжилтнүүд ч хэлж байна. Иймд өнөөдөр хувь хүнийхээ зүгээс, мэргэжлийн хүнийхээ хувьд хөдөлгөөнд нэгдэж байна. Залуучууддаа хандаж хэлье, бид хөгшрөхгүй, өвдөхгүй, үр хүүхэдтэй болохгүй юм шиг амьдарч болохгүй. Ирээдүйн амьдралынхаа санхүүгийн эрх чөлөөний төлөө тэмцэх хэрэгтэй цаг үе ирчихээд байна.