НАТО-гийн цэргийн хүчний тэргүүлсэн "Шийдвэртэй дэмжлэг" ажиллагаанд оролцохоор 120 монгол цэрэг энэ сарын 20-ны өдөр Афганистан улсыг зорьжээ.
Энхийг сахиулагчдыг ЗХЖШ-ын удирдлага болон АНУ-аас Монгол Улсад суугаа Онц бөгөөд бүрэн эрхт Элчин сайд Майк Клечески үдэж өгсөн байна. Элчин сайд Клечески Монголын энхийг сахиулагчдын мэргэжлийн ур чадвар, эр зориг, нэртэй хувь нэмрийг нь дэлхий дахинд үнэлж, үйл хэрэгт нь талархаж байгааг онцолж талархал илэрхийлэв. Мөн тэрээр "Монголын энхийг сахиулагчдыг үдэх, хүлээн авах бүрт сэтгэл хөдөлгөм байдаг. Энэ долоо хоногт ч мөн адил байлаа. Олон улсын энхийг сахиулах энэхүү бахдам үйл хэргийг АНУ-аас дэмжиж ажилладагт баяртай байна" гэжээ.
НАТО болон Эвслийн цэргийн хүчний явуулж буй Афганистан улс дахь аюулгүй байдлыг хангах, тогтворжуулах цэргийн ажиллагааны II дугаар шат буюу “Шийдвэртэй дэмжлэг ажиллагаа” 2015 оны нэгдүгээр сарын 01-ний өдрөөс эхэлсэн юм. Энэхүү “Шийдвэртэй дэмжлэг ажиллагаа”-ны үндсэн зорилго нь Афганистаны үндэсний аюулгүй байдлыг хангах хүчний үүрэг гүйцэтгэх чадавхийг нэмэгдүүлэх, сургах, дадлагажуулах, дэмжлэг үзүүлэхэд тус тус чиглэдэг байна. Уг ажиллагаанд НАТО-гийн гишүүн болон түнш орнуудын нийт 12000 орчим цэргийн алба хаагч үүрэг гүйцэтгэх ажээ.
