Саяхан Архангай аймгийн Цахир сум, Солонготын давааны орчимд нэг дор зам тээврийн хоёр том осол гарч хоёр хүн амиа алдсан харамсалтай явдал болсон билээ. Энэ удаагийн осол анхных биш бөгөөд уг замыг "үхлийн зам" гэж нэрлэх болсон талаар тус замаар зорчигчид ярьдаг.

Давааны орчимд аюулгүй байдлыг анхааруулсан замын тэмдэг, тэмдэглэгээ, хашлага байхгүй тул Зам, тээврийн хөгжлийн яамны санаачилгаар туузан хашлага, хурд сааруулагч, нэмэлт тэмдгүүдийг байрлуулж эхэлжээ. 

Энэ ажлыг гүйцэтгэж байгаа Завхан АЗЗА ТӨХК "А0603 дугаартай Цэцэрлэг-Тосонцэнгэл-Нөмрөг чиглэлийн 245-246км буюу Солонготын давааны цагаан гүүрний хэсэгт удаа дараа авто осол болсон уг хэсгийн барилгын ажил нь бүрэн дуусаагүй байгаа учир манай компани хүлээж аваагүй. Цахир-Тосонцэнгэл чиглэлийн 127 км авто замын гүйцэтгэгчид давааны хэсгийг яаралтай дуусгах (туузан хашлага) тавихыг удаа дараа шаардсан боловч мөнгө байхгүй гэсэн шалтгаанаар хийгээгүй. Завхан АЗЗА ТӨХК нь ЗТХЯ-ны өгсөн үүрэг даалгаврын дагуу нэмэлтээр замын хөдөлгөөний тэмдгүүд, хурд сааруулагч, 150у/м туузан хашлагыг энэ сарын 18-наас эхлэн хийж байна" гэжээ.