БНХАУ-ын Мал эмнэлэг, хорио цээрийн хянан магадлагааны ажлын баг манай улсад өчигдөр иржээ. Тус баг Монголд 7 хоног ажиллаж, экспортод гаргах махыг дулааны аргаар бэлдэж буй үйл ажиллагаатай танилцах бөгөөд тус улс руу хийх мах экспортыг нэмэгдүүлэх талаар хэлэлцэх юм.
Манай улс БНХАУ, ОХУ, Вьетнам, Япон, Иран, Казахстан зэрэг улсад энэ онд 40 мянган тонн мах экспортлоод байна. ХХААХҮ-ийн дэд сайд Ж.Сауле махны экспорт хэвийн явагдаж буйг мэдэгджээ. ХХААХҮЯ салбараа төлөөлөн ААН-үүдтэй бодлогын гэрээ байгуулж, ААН-үүдэд экспортын зөвшөөрөл олгож байгаа юм байна.
Одоогийн байдлаар 3 мянган тонн махыг дулааны аргаар бэлдэн ХХААХҮ-ийн сайдын шийдвэрээр экспортод гаргахад бэлэн байгаа аж. Энэ талаар Хүнсний аюулгүй байдлын зөвлөлд мэдэгдэн, тоо, хэмжээг нь тогтоох хүсэлтийг яамнаас өгөөд байгаа аж. Мөн дулааны аргаар мах экспортлох стандартыг боловсруулж, зохих шаардлагыг хангуулж мөрдөх талаар ажиллаж байна гэв.
Сүүлийн үед манай улсаас Хонконг, Иран, Вьетнам руу мах экспортлох нь нэмэгдэж байгаа бөгөөд махны экспортоос орох орлогын 80 хувийг адууны мах бүрдүүлж байна. Хонь, ямаа, үхрийн махны нийлүүлэлт ч мөн өсчээ.
