МҮОНТВ-ийн сэтгүүлч А.Бүрэнбаатар өнгөрсөн есдүгээр сард сэтгүүлчдийн үнэлэмж буурсан, сэтгүүлчдэд итгэх уншигч, үзэгч, сонсогчдийн итгэл алдарсан, салбарын нэр хүнд бүхэлдээ унасан энэ үед сэтгүүлчдийн толгой байгууллага ажлаа зохих ёсоор хийхгүй байгаад бухимдлаа илэрхийлж хэвлэлийн бага хурал хийсэн билээ.
Тэрбээр МСНЭ-ийн үйл ажиллагааг шүүмжилж Ерөнхийлөгч Х.Мандахбаярыг ажлаа өгөхийг шаардан, Монголын сэтгүүлчдийн Онц их хурал хуралдуулах санаачилга гаргаж Түр зөвлөл байгуулах талаар мэдээлж байсан.
Энэхүү санаачилгад 500 орчим сэтгүүлч, 10 гаруй томоохон редакци нэгдээд байгааг гэсэн бол өнөөдөр тэд Монголын сэтгүүлчдийн Онц их хурал хуралдуулах Түр хороог байгуулжээ. Түр хороог салбар бүрийн оролцоог ханган 21 хүний бүрэлдэхүүнтэйгээр байгуулсан байна.
Сэтгүүлчдийн онц их хурал нь хэн нэгэн хүний албан тушаал эрх мэдлийн төлөөх тэмцэл биш салбарын оршин байхуйн тухай асуудал юм гээд Түр хорооны дараачийн хуралдаанаар Онц их хурлын товыг зарлана гэв.
