НИТХ-ын ээлжит 29 дүгээр хуралдаанаар өнөөдөр нийслэлийн 2020 оны төсвийг баталжээ. Нийслэлийн орон нутгийн төсвийн суурь орлогыг 894.1 тэрбум төгрөг, суурь зарлагыг 338.1 тэрбум төгрөг, Төсвийн тухай хуулийн 56 дугаар зүйлийн 56.2.2 дахь заалтын дагуу орон нутгийн үндсэн төслийн ажлын 30 хувь болох 319.4 тэрбум төгрөгийг улсын төсөвт татан төвлөрүүлэхээр тусгажээ.
Мөн нийслэлийн орон нутгийн хөгжлийн сангийн хөрөнгөөр 2019 онд батлагдсан түвшнээс 770.5 сая төгрөгөөр нэмэгдүүлж 27.3 тэрбум төгрөг байхаар, боловсрол, эрүүл мэнд, хүүхэд хөгжил хамгаалал, газрын харилцааны салбарын нийт үйл ажиллагааны зардлыг 2019 оныхоос 96 тэрбум төгрөгөөр нэмэгдүүлж, 494 тэрбум төгрөг байхаар тус тус баталсан байна.
Нийслэлийн 2020 оны төсвийн 39 хувийг хот байгуулалт дэд бүтэц, 30 хувийг авто замын салбарт, 12 хувийг нийгмийн салбарт томоохон хөрөнгө оруулалт хийхээр баталжээ. Түүнчлэн 2020 онд хувьчлах нийслэлийн өмчит байгууллага, барилга байгууламжийн жагсаалтыг баталжээ.
Хувьчлах обьектийн жагсаалтад Нийслэлийн өмчит нэг компани, долоон барилга байгууламжбагтсан бөгөөд хувьчлалаас олох орлогыг 68.3 тэрбум төгрөгөөр төлөвлөжээ. Үүнээс "Төв цэнгэлдэх хүрээлэн" ХХК-ийн төрийн өмчийн 49 хувийг 20 тэрбум төгрөгөөр үнэлсэн байна.
Анх 2000 онд ТӨХ-ны тогтоолоор Төв цэнгэлдэх хүрээлэнгийн 30 хувийг иргэн Т.Нямдаваад хувьчилсан бөгөөд 2003 онд иргэн Т.Нямдаваа өөрийн эзэмшлийн 30 хувийг "Говийн од" ХХК-д худалдсаны дараа Нийслэлийн захиргааны хэргийн шүүх Т.Нямдаваагийн нэхэмжлэлийн дагуу "Цэнгэлдэх хүрээлэн"-ийн Нийслэлийн өмчийн хувийг 49 хувь болгон бууруулсан байна.
Ц.Туяа