Монгол Улсын Засгийн газартай АНУ-ын Мянганы сорилтын корпорац /МСК/ Улаанбаатар хотын усан хангамжийг сайжруулах 350 сая ам.долларын гэрээ байгуулаад байгаа. Энэ нь МСК-аас манай улстай хийж буй 2 дахь компакт гэрээ юм.

Өчигдөр МСК-иас төсөл, гэрээний хүрээнд авлига, хээл хахууль, санхүүгийн луйврын эсрэг баримталдаг зарчим, журам аргачлалын тухай танилцуулж хэлэлцүүллээ. Хэлэлцүүлэгт АНУ-аас Монгол Улсад суугаа Онц бөгөөд Бүрэн эрхт Элчин сайд Майкл С.Клечески оролцов. Тэрээр, МСК хөгжлийн тусламж үзүүлэх хамтын ажиллагааг шинэ хэлбэрээр явуулж буйг онцлоод, хэрэгжүүлэх гэрээ төсөл нь үр дүнд суурилсан, тухайн орны иргэд өөрсдөө эзний ёсоор хандах учиртайг тэмдэглэв.

Мөн “Төсөл, гэрээний хүрээнд баригдах хатуу дэд бүтцээс гадна гэрээний үйл ажиллагаанд сайн бодлого бүхий сайн засаглал хэрэгжих учиртай”-г тэрээр онцолж, гэрээ хэрэгжихийн өмнө авлига, хээл хахууль, санхүүгийн луйврын эсрэг баримталдаг зарчим, журам аргачлалын тухай, мөн гэрээг хэрэгжүүлэхэд оролцох гадна, дотны байгууллага, ААН-үүдэд сургалт явуулахаар болсныг МСК-иас мэдээлсэн юм.

Сургалтыг зохион байгуулахаар манай улсад АНУ-ын МСК-ын Авлига, хээл хахууль, санхүүгийн луйвартай тэмцэх асуудал хариуцсан ахлах захирал Кристофер П.Уильямс ирээд байгаа юм байна. Тэрээр “Аливаа гэрээг хэрэгжүүлэхэд юуны өмнө авлига, хээл хахууль, санхүүгийн луйврын эсрэг баримталдаг зарчим, журам аргачлалын гол үндсэн шаардлага нь гэрээний үйл ажиллагаа ил тод байж, сайн засаглалын зарчим үйлчилж байх ёстой” гэв. 

Уулзалтад ил тод байдал, сайн засаглалын чиглэлээр ажилладаг “Транспарэнси интернэшнл”, Нээлттэй нийгэм хүрээлэн, “Ил тод байдал сан”, “Де факто” институц, МҮХАҮТ зэрэг ТББ, иргэний нийгмийн төлөөлөл болон сэтгүүлчид оролцлоо.