Цахим луйвар хийсэн байж болзошгүй БНХАУ-ын 759 иргэнийг нутагт нь буцаагаад байгаа.
Тэгвэл эдгээр хятад иргэний толгойлогч, зохион байгуулагч, хөрөнгө оруулагч байж болзошгүй 10 орчим хүнийг Монголд үлдээн хэргийг шалгах ажиллагаа үргэлжилж байна. Толгойлогчийн заримыг Шангри-Ла зочид буудлаас саатуулсан бол нэг нь "Гурван гал" худалдааны төв орчим дахь орон сууцнаасаа оргон зайлсан байсныг Замын-Үүдээс баривчилжээ.
700 гаруй иргэнийг саатуулах үйл ажиллагаа өнгөрсөн сарын 29-30-нд шилжих шөнө хийгдсэн бол Замын-Үүд рүү оргон зайлсан хүнийг аравдугаар сарын 30-ны 19:00 цагт саатуулсан байна. Монголд үлдээн шалгаж буй 10 орчим хүний гурав нь Монгол Улсын иргэн байгааг эх сурвалжууд мэдээлжээ.
Нутаг буцаасан хятад иргэдийн өндөр хүчин чадал бүхий 1000 орчим комьпютер, гар утас, 10 мянга гаруй үүрэн холбооны дата сим картууд, онц их хэмжээний валют бэлнээр, мөн тансаг зэрэглэлийн автомашинуудыг хураан авсан тухай албаныхан мэдээлсэн.