Д.Ядамдорж: СҮҮЛИЙН 10 ЖИЛД 118 ТОХИОЛДЛООР 158 ХҮН УГААРТАЖ НАС БАРСАН

Засгийн газар өнгөрөгч есдүгээр сарын 1-нээс эхлэн нийслэлчүүдэд түүхий нүүрс хэрэглэхийг хориглож, “Тавантолгой түлш” компанийн үйлдвэрлэсэн сайжруулсан шахмал түлшийг хэрэглэж байна. Гэвч энэ хугацаанд найман хүн угаарын хийнд хордон нас барж, 800 орчим иргэн эмнэлгийн үйлчилгээ аваад байгаа.

Энэ асуудлаар өнөөдөр НИТХ дээр Хяналтын сонсгол зохион байгуулж, төлөөлөгчид болон иргэдийн зүгээс холбогдох албаны хүмүүсээс тайлбар, мэдээлэл шаардлаа.

Угаартсан гэх дуудлагын мөрөөр хамгийн түрүүнд Нийслэлийн Цагдаагийн газрынхан очиж, үзлэг шалгалт хийж, шалтгаан нөхцөлийг тодруулахаар ажилладаг тул НЦГ-ын дарга Д.Ядамдорж дараах мэдээллийг хийлээ.

Д.Ядамдорж:

-“Сүүлийн 10 жилийн байдлаар 118 тохиолдолд 158 хүн угаартаж нас барсан. 2019 оны аравдугаар сарын 19-нөөс хойш иргэд угаартаж, нас бараагүй, дуудлагын тоо буурч байна.

Цагдаагийн байгууллагад бүртгэгдсэн мэдээллээр угаартсан шалтгаан нөхцөлийг авч үзлээ. Гэрт 101, байшинд 202, энгийн зуух 203, төслийн зуух 86, нам даралтын зуух зургаа байсан. Ханан пийшинтэй нь 86, ханан пийшин, зуух эвдэрсэн 73, зуух, яндангийн холбоос завсартай 34, яндан хөө тортогтой 30, үнс дүүрсэн 44, түлшээ дүргээд түлсэн 85, яндан намхан 35, яндангийн хаалтаа хаасан 69, тодорхойгүй 50 тохиолдол, усгүйгээс зуух нь дэлбэрсэн гурван тохиолдол дээр цагдаагийн алба хаагчид очиж ажилласан. Одоогоор долоон тохиолдлоор найман хүн нас бараад байна. Энэ хэрэг дээр Мөрдөн шалгах газрынхан ажиллаж байгаа. Эцсийн шийдвэрийг прокурор гаргана. Хариуцлагын асуудал ямар албан тушаалтнуудыг хамрах вэ гэдэг ч прокурорын шийдэх асуудал” гэв.

ГЕГ САЙЖРУУЛСАН ТҮЛШИЙГ ШИНЖЛЭЭГҮЙ

Мөн Гаалийн ерөнхий газрын дэргэдэх Гаалийн төв лабораториос сайжруулсан шахмал түлшний найрлагатай холбоотой дараах мэдээллийг хийлээ. 

н.Цэрэнчимэд:

-"2018 оны есдүгээр сараас 2019 оны аравдугаар сар хүртэл 28 гаалийн бүрдүүлэлтээр 6100 тонн барьцалдуулагч бодис орж ирсэн. “Тавантолгой түлш”, “Эм солер” компаниуд уг бодисыг импортоор оруулж ирсэн. Аюулгүйн ажиллагааны зааварчилгаатай. Гаалийн лабораторид барьцалдуулагч бодисыг шинжилж үзэхэд цавуулаг, цардуул, шаварлаг эрдсээс тогтсон байна гэдгийг тодорхойлсон. Цэвэр химийн бодис биш. Цардуул шатахаараа аюулгүй, эрдэслэг шаварлаг нь шатахаараа өвс болоод үлдэнэ. Зөв тайлбарламаар байна. Цардуулыг барьцалдуулагч бодисоор хэрэглэдэг олон улсын туршлага байна.

Гаалийн төв лаборатори улсын хилээр импортолж байгаа бодис дээр шинжилгээ хийдэг. Нүүрсний хувьд “Энержи ресурс” компанийн баяжуулсан кокс нүүрс хэрэглэдэг. Шинжлээд үзэхээр боловсруулаагүй нүүрс, баяжуулсан нүүрс хоёрын дунд дэгдэмхий бодисын хэмжээ хоёр дахин бага байгаа. Боловсруулаагүй нүүрс дээр 40-45 байхад шахмал түлш хийгээд байгаа түлшин дээр 18-23 байгаа. Шатаад гарах ёстой дэгдэмхий бодис хоёр дахин бага байна, хоёр дахин бага хордож байна гэсэн үг.

Гаалийн байгууллага эцсийн бүтээгдэхүүн болох шахмал түлшинд шинжилгээ хийж байгаагүй, Нүүрсэн дээр, импортоор орж ирж байгаа барьцалдуулагч бодис дээр хийж байгаа" гэв.