Засгийн газрын хуралдаанд мэдээлэл хийснийхээ дараа ЦЕГ-ийн дарга С.Баатаржав, ТЕГ-ын дарга Д.Гэрэл нар өчигдөр орой болон өнгөрсөн шөнө явуулсан баривчилгааны талаар сэтгүүлчдийн асуултад хариуллаа.

С.Баатаржав:

-ЦЕГ-ын Кибер гэмт хэрэгтэй тэмцэх хэлтэс уг хэргийг шалгаж байгаа. Энэ асуудалтай холбоотойгоор таван зочид буудал, үүрэн телефоны зарим операторуудад хариуцлагын асуудал яригдана. 

Одоогийн байдлаар 700 гаруй хятад иргэн байрласан зочид буудлууддаа байгаа. Тэднийг хорьж цагдах боломж байр савны асуудлаас эхлээд байхгүй. Одоогоор бичиг баримтын шалгалт хийгдэж байна. Ихэнх нь аялал, жуулчлалын, бизнес ангиллын визтэй, хөдөлмөр эрхлэх зөвшөөрөл байхгүй. Мөрийтэй, бооцоот тоглоомын үйл ажиллагаа явуулсан хэргээр шалгагдаж байгаа. Нэмж илрүүлэх ажиллагаа явагдана. Ер нь бол энэ улсуудыг албадан гаргана. Эдгээр хүмүүсийг хэрэг үйлдсэн гэж үзэх үндэслэл байхгүй. Зөвхөн зохион байгуулсан хүмүүсийг нь шалгана.

ТЕГ-ын дарга Д.Гэрэл:

-"Бидэнд энэ оны наймдугаар сараас хойш мэдээлэл авагдаж байсан. Эхний ээлжинд 80 хүн орж ирсэн, өчигдрийн байдлаар илрүүлсэн хүний тоо 800-д хүрсэн. Үүнийг зохион байгуулсан хүн нь тодорхой байгаа. Тэдгээр хятад иргэд 1,000-аад компьютер, 10,000-аад гар утасны сим ашиглаж байсан. Энэ бүхэн бүрэн хяналтад байгаа. Айх ямар ч хэрэг байхгүй. 

Хятад иргэдтэй холбоотой асуудлыг одоогийн байдлаар мөнгө угаах гэмт хэрэгтэй холбоотой гэж үзэж байгаа. Мөнгө угаах нь тоглоом ч байж болно. Бусад хэлбэрээр ч байж болно. Энэ дээр манай байгууллагын болон цагдаагийн байгууллага хамтарсан шалгалт явуулж байгаа. 

Удирдаж,зохион байгуулж байгаа хүмүүсийг саатуулсан. Бусдыг нь байрлаж байсан таван зочид буудалд нь байлгаж байгаа. Хятадын талаас дөрөв, манай талаас нэг иргэнийг саатуулан шалгаж байгаа. 

Наймдугаар сараас хойш жуулчлалын визээр 20-30-аараа цуварч орж ирсэн. Тэдгээр иргэд жуулчлалын визээр орж ирсэн ч ажил хийж байсан. Тиймээс бид албадан гаргах бүрэн эрхтэй.