Төрийн албанд анх орох иргэдийг ерөнхий шалгалтад энэ сарын 1-30-нд бүртгэж буйгаа тухай Төрийн албаны зөвлөлөөс өчигдөр мэдээлжээ.

Бүртгэлийг www.csc.gov.mn вэб сайтаар цахимаар хийж байна. Ерөнхий шалгалтыг 11-р сарын 11-25-нд орон даяар зохион байгуулахаар Төрийн албаны зөвлөлөөс төв болон салбар комисс байгуулсан байна.

Энэ оны эхнээс мөрдөж буй Төрийн албаны тухай шинэ хуульд төрийн албанд анх орох иргэдээс ерөнхий шалгалт авч байхаар заажээ. Өмнөх хуулиар төрийн албаны шалгалт өгөөд бүртгэгдсэн иргэд шууд ажилдаа томилогдон ордог байсан бол одоо шалгалтад тэнцсэн иргэдийг төрийн албаны нөөцөд бүртгэдэг болсон. Дараа нь албан тушаалын буюу тусгай шалгалт өгч байхаар зохицуулсныг ТАЗ-өөс мэдээллээ.

Ерөнхий шалгалтаар ярилцлага хийхгүй, гурван чиглэлийн шалгалттай, тэдгээр нь тус бүртээ босго оноотой. Эхний шатанд 35-аас дээш оноо авч тэнцэж, дараагийн шат болох монгол хэл, монгол бичгийн шалгалтад орох эрхтэй болно. Энэ шалгалт 30 минут үргэлжилнэ. Монгол хэл бичгийн шалгалтад 20 ба түүнээс дээш оноо авч дараагийн дүн шинжилгээ хийх шалгалтыг өгөх эрхтэй болно. Энэ шалгалт нь 20 минут үргэлжлэх бол сэтгэхүйн чадамжийг үнэлэх шалгалтад 10-аас дээш оноо авсан иргэн тэнцэж, төрийн албаны нөөцөд гурван жилийн хугацаатай бүртгэгдэх юм байна. Шалгалтад Монгол Улсын нийгэм, эдийн засаг, түүх, соёл, мэдээллийн технологийн мэдлэгийн агуулга багтаж байгаа аж.

Одоогийн байдлаар, төрийн албаны ерөнхий шалгалтад хамрагдахаар 5000 хүн хандаж, 1800 гаруй иргэн бүртгүүлээд байна. Шалгалт өгч буй иргэд ихэвчлэн хууль эрхзүй болон монгол үндэсний бичгийн шалгалтад унаж байгааг мөн хэлэв.