Гадаадын иргэн, харьяатын газрын дарга Д.Мөрөн цаг үеийн асуудлаар мэдээлэл хийлээ.

Өнөөдрийн байдлаар Монгол Улсад түр ирэгч, албан болон хувийн хэргээр оршин сууж буй 131 улсын нийт 28,268 иргэн байна. Байршлаар авч үзвэл 20,111 хүн Улаанбаатар хот, Дорнодод 1,568 хүн, Өмнөговь аймагт 1,409 гадаадын иргэн ажиллаж, амьдарч байна.

Монгол Улсад амьдарч буй иргэдийн оршин сууж буй хэлбэрээр авч үзвэл:

• Монгол Улсын иргэнээс төрсөн 18 хүртэлх насны хүүхэд 2,695 /Холимог гэр бүлээс төрсөн/
• Хөдөлмөр эрхлэгч болон тэдний гэр бүлийн гишүүд 11,114
• Ерөнхий боловсролын ба их, дээд сургуульд суралцагч 2,772
• Хөрөнгө оруулагч 2,989
• Цагаач болон харьяалалгүй иргэн 1,927 байна.

Хувийн хэргээр оршин сууж буй гадны иргэн нь Монгол Улсын хүн амын гурван хувьтай тэнцэнэ. 

Виз олгосон тоо нь өмнөх оноос 8 хувиар өсчээ

Гадаадын иргэнд виз олгодог гурван субъект бий. Гадаадын иргэн, харьяатын газар нь эдгээрийн нэг юм. 30 хоногийн доторх визийг дипломат төлөөлөгчийн газар олгоно. 

30 хоногоос дээш хугацааны 144 улсын иргэдэд виз олгосон бөгөөд виз олгосон тоо нь өмнөх оноос 8 хувиар өссөн дүнтэй байна. 

2019 оны тавдугаар сарын 1-нээс цахимаар виз олгож эхэлсэн байна. 

3000 орчим гадаад оюутан Монголын их, дээд сургуульд суралцаж байна

39 орны 2,907 иргэн Монгол Улсын их, дээд сургуулиудад суралцаж байна. Голчлон МУБИС, МУИС, АШУҮИС, СУИС, ХААИС-д гадаадын олон оюутан суралцаж байна. БНХАУ-ын 2,156 оюутан суралцаж байгаагийн 90 гаруй хувь нь Өвөрмонгол оюутан байна.

ОХУ-аас 340 оюутан, Өмнөд Солонгосын 100 гаруй, Японоос 89 оюутан суралцаж байна. 

Хөдөлмөр эрхэлж буй иргэдийн дийлэнх нь БНХАУ-ын иргэд

Монгол Улсад гадаадын 87 улсын 9,929 иргэн хөдөлмөр эрхэлж байна. Нийтдээ 8,522 иргэнд зөвшөөрөл өгснөөс 6,993 хятад иргэн ажиллаж байна. Чиглэлээр нь авч үзвэл дийлэнх нь газрын тос болон зам гүүр барьж байна.

Түүнчлэн

• Австрали 216
• Вьетнам 111
• ОХУ 193 иргэн хөдөлмөр эрхэлж байгаа аж. 2018 онд 8,425 иргэн хөдөлмөр эрхлэх зөвшөөрлийг гадаадын иргэдэд олгож байв. 

Гадаадын иргэн, харьяатын газраас 976 аж ахуйн нэгж, байгууллагад ажиллаж буй 36 улсын 10,292 иргэний бичиг баримтад шалгалт хийжээ.

Урьсан иргэнээ бүртгүүлдэггүй, визний хугацаа хэтрүүлдэг, төрийн байгууллагад ханддаггүй зөрчлүүд илэрсэн.

Илэрсэн зөрчлүүдэд дараах арга хэмжээг авсан байна.

• Урьсан иргэнээ хугацаанд нь бүртгүүлээгүй 117 аж ахуйн нэгжийн 216 хүнд, 
• Оршин суух зөвшөөрлийн хугацаа хэтрүүлсэн 820 уригч байгууллагын 2,159 хүнд, 
• Визийн хугацаа хэтрүүлсэн 74 уригч байгууллагын 253 хүнд буюу нийт 1,111 уригч байгууллагын 2,628 иргэнд Зөрчлийн хуулийн дагуу 1,032,270,000 /Нэг тэрбум, гучин хоёр сая, хоёр зуун далан мянга/ төгрөгийн торгууль ногдуулж, 22 улсын 372 иргэнийг албадан гаргасан байна.

Албадан гаргасан иргэний дийлэнх нь зөвшөөрөлгүй хөдөлмөр эрхлэгчид аж. Мөн ирсэн зорилгоосоо өөр үйл ажиллагаа эрхэлж байсан байна. Тухайлбал, аялахаар юиз мэдүүлсэн ч хөдөлмөр эрхлэх тохиолдол их байгаа тухай албаныхан мэдээллээ.

Энэ талаар ГИХГ-ын дарга Д.Мөрөн 

-"30 хоногийн дотор зорчих ангиллын визээр нэвтэрсэн хүмүүс зөвшөөрөлгүй хөдөлмөр эрхлэх зөрчил их гаргаж байна. Энэ төрлийн визийг голдуу Эрээний консул, Хөх хотын консул өгч байгаа. Үүнийг Засгийн газарт танилцуулсан бөгөөд виз олголтыг шалгах Ажлын хэсгийг байгуулсан. Арваннэгдүгээр сарын 20-ны дотор шалгаж, гарсан үр дүнг нь Засгийн газарт танилцуулах үүрэг өгсөн. 

Мөн өөрийн квотоор оруулж ирсэн хүнээ өөр байгууллагад ажиллуулах асуудал их ажиглагдаж байна. Тухайлбал, зам гүүр барих зөвшөөрлөөр орж ирсэн хэр нь махны үйлдвэрт ажиллаж байгаа тохиолдол гарсан. Өөрөөр хэлбэл, аж ахуйн нэгжүүд квотоо зарах тохиолдол гарч байгаа" гэв.