2019 оны аравдугаар сарын 3-14-ний өдрүүдэд угаарын хийн хордлогын 136 удаагийн дуудлагаар 293 иргэнд /120 хүүхэд, 173 насанд хүрэгсэд/ эмнэлгийн тусламж үзүүлээд байна гэж нийслэлийн Эрүүл мэндийн газраас өнөөдөр мэдээллээ. Мөн дуудлага өгч буй иргэдийн тоо багассан гэдгийг Нийслэлийн Онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүй хэлэв.

Харин Нийслэлийн мэргэжлийн хяналтын газрын дэд дарга С.Даваасүрэн "Сайжруулсан шахмалт түлшийг Геологийн төв лаборатори, Ашигт малтмал, газрын тосны төв лаборатори, Гаалийн ерөнхий газрын лаборатори, Хими технологийн хүрээлэнгийн лаборториор шинжлүүлсэн эцсийн дүгнэлт гарсан. Сайжруулсан шахмал түлш нь хүний бие, амь насанд хор нөлөөгүй гэсэн дүгнэлт гарсан. Мөн түлшний зөв хэрэглээний талаар зөвлөмж мэдээллийг айл өрхүүдэд тараах материалаар болон хэвлэл мэдээллийн хэрэгсэл, үүрэн телефоны оператор компаниудаар хүргэж байгаа нь үр дүнгээ өгч байна гэв.

Түүнчлэн нийслэлийн бүс рүү түүхий нүүрс оруулж ирэхийг завдсан болон, хэрэглэж буй талаарх мэдээллийг хүлээж авах утас ажиллуулж, Зөрчлийн тухай хуулийн дагуу хувь хүнийг 300 мянган төгрөгөөр, аж ахуйн нэгж, байгууллагыг гурван сая төгрөгөөр торгохыг анхаарууллаа.

Нийслэлийн ЗДТГ-ын Хэвлэл мэдээлэл, олон нийттэй харилцах хэлтэс