Засгийн газрын хуралдааны 2019 оны 28 дугаар тогтолоор бага ангийн сурагчдыг сурах бичгийг төрөөс 100 хувь дааж, 6-12 дугаар ангийн хүүхдүүдийн сурах бичгийн 40 хувийг төрөөс даахаар болсон.
Үлдсэн 60 хувь буюу 2019-2020 оны хичээлийн жилд ахлах, дунд ангийн 181 мянга гаруй сурагчийн сурах бичгийг түрээсээр хангах юм байна.
181 мянган сурагчийг бүх хичээлийн сурах бичгээр нь хангана гэж тооцоолвол нийт 2.6 сая ширхэг сурах бичиг хэрэгтэй болж байгаа бөгөөд Азийн хөгжлийн банк ойролцоогоор найман тэрбум орчим төгрөгийн санхүүжилтийг шийджээ.
Тодруулбал, 6-12 дугаар ангийн түрээсийн сурах бичгүүдийг хэвлэх тендерийг 6,7 дугаар анги, 8,9 дүгээр анги, 10-12 дугаар анги гэж гурав хувааж зарласан байна.
Одоогоор 10-12 дугаар анги болон 6,7 дугаар ангийн сурах бичгүүдийг хэвлэж байгаа бөгөөд 6,7 дугаар ангийн сурах бичгүүд тараагдаж эхэлсэн байна.
Харин 8,9 дүгээр ангийн сурах бичгийн хувьд хэвлэх зөвшөөрөл нь сүүлд ирсэн учраас өнөөдрөөс хэвлэлтэд орж байгаа гэдгийг БСШУСЯ-ны Ерөнхий боловсролын бодлогын газрын мэргэжилтэн Р.Балжинням хэллээ.
БСШУСЯ сурах бичгүүдийг хоёрдугаар улирлын хичээл эхлэхээс өмнө сургуулиудад тарааж дуусахыг зорьж байгаа бөгөөд тэр болтол цахим орчинд байршуулсан сурах бичгүүдийг ашиглаж болно гэв.