Нийслэлийн мэргэжлийн хяналтын газар, Түргэн тусламжийн 103 төв, Онцгой байдлын газраас хамтарсан мэдээлэл өнөөдөр хийсэн билээ.

Энэ үеэр 2019 оны аравдугаар сарын 2-ны өдрийн 09.00 цагаас өнөөдрийн 06.00 цаг хүртэлх хугацаанд 60 өрхийн 135 хүн угаарын хийн хордлогын улмаас эмнэлгийн тусламж үйлчилгээ авсны 80 нь насанд хүрэгчид, 55 нь хүүхэд байсан гэдгийг хэллээ..

Нийслэлийн түргэн тусламж 54 өрхийн 122 хүнд үйлчилгээ үзүүлсэн бол Эх хүүхдийн эрүүл мэндийн үндэсний төвд 38 хүүхэд эмчилгээнд хамрагджээ. Үүнээс 17 хүүхдэд гэрээр зөвлөгөө өгч, гурван хүүхэд хэвтэн эмчлүүлж байна. Насанд хүрэгчдийн 60 хувь нь эмчилгээнд хамрагдаж, 20 хүнд гэрээр зөвлөгөө өгчээ.

Мөн хордлогын төвд одоогийн байдлаар долоон хүн эмчлэгдэж байгаагаас нэг хүн нь маш хүнд, тав нь хүнд, үлдсэн нэг хүний биеийн байдал хүндэвтэр байна.  Өглөөний 07.30 цагт гурван сартай У тархины даралттай учраас эргэн хэвтсэн гэдгийг Нийслэлийн онцгой байдлын газрын мэргэжилтэн Г.Нэргүй хэллээ. 

Мөн тэрбээр нийслэлийн онцгой комиссоос өгсөн үүрэг даалгаврын дагуу шахмал түлшийг зөв хэрэглэх, зуухны галлагааны талаарх мэдээллийг төвийн зургаан дүүрэгт, нийслэлийн төр захиргааны байгууллагын албан хаагчид болон гэрээт албан хаагчид, хороодын албан хаагчид хамтран өрхүүдээр орж тараах материалаар хүргэж өгч байгаа гэв. Эхний байдлаар 15,715 өрхөд хүрч ажиллаад байгаа юм байна.

Гэр хорооллын 220 мянган өрхийн 50 орчим хувь нь ердийн зуух хэрэглэдэг. Сайжруулсан шахмал түлш хэрэглэж байгаа үед ердийн зуух, төслийн зуухыг зохих журмын дагуу ажиллуулах шаардлагатай бөгөөд шөнөдөө ханан пийшингийн сойлтуурыг хаахгүй байхыг зөвлөлөө.