Өнгөрсөн амралтын өдрүүдэд угаарын хийнд хордсон 16 иргэн хордлогын шоктой эмнэлэгт хүргэгдэж, дөрөв нь амиа алдсан харамсалтай явдал болсон билээ.
Уг хэргийн дараа Нийслэлийн захирагч Онцгой комисс байгуулан ажиллаж, сайжруулсан шахмал түлш борлуулах 17 цэгээс 23 дээж авч АМГТГ-ын харьяа лаборатори, Геологийн төв лаборатори болон барьцалдуулагч бодисыг шалгуулахаар ГЕГ-ын лабораторид шинжлүүлсэн байдаг.
Шинжилгээний дүн гарсны дараа буюу өчигдөр Нийслэлийн Засаг даргын орлогч, Нийслэлийн мэргэжлийн хяналтын газрын дарга нар "Иргэд химийн бодисонд хордоогүй, угаартсан байна. Нэг хашаанд хоёр айл сайжруулсан түлш хэрэглэсэн байхад нэг айл нь зүгээр байхад, нөгөөх айлын хоёр хүүхэд угаартаж, хордлого тайлах эмчилгээ хийлгэсэн. Энэ бол хэрэглээнээс үүсч байна. Иргэд маш олон төрлийн баталгаагүй зуух хэрэглэж байна" хэмээн иргэдийг буруутгасан билээ.
Тэгвэл өнөөдөр энэ асуудлаар "Гэр хороолол" хөдөлгөөний тэргүүн Б.Батсүх, гүйцэтгэх захирал Я.Мөнгөнцэцэг нар Үндэсний мэдээллийн төвд мэдээлэл хийлээ. Тэд таван хүн амиа алдсаны төлөө Засгийн газрын тэргүүн У.Хүрэлсүх, хотын дарга С.Амарсайхан нар огцрох ёстой гэв. Мөн Засгийн газрын тэргүүн, хотын кахирагч нарыг огцрох хүртэл тэд тэмцэнэ гэлээ.
"Шахмал түлшийг эсэргүүцэж, гэр хорооллын иргэдийн газрыг эргэлтэд оруулж, дахин төлөвлөлтийн төслийг үргэлжлүүлэхийг бид удаа дараа шаардаж, тэмцсэн боловч сонсоогүй. Цаашид хэдэн хүн амиа алдахыг мэдэхгүй. Тиймээс амь нас, эрүүл мэндээрээ хохирч, үр хүүхдээ золиосолж буй гэр хорооллынхны төлөөх тэмцлээ бид Сүхбаатарын талбайд жагсаалаар эхлүүлнэ. Цаашлаад суулт, өлсгөлөн зарлана" хөдөлгөөний гүйцэтгэх захирал Я.Мөнгөнцэцэг мэдэгдлээ.
