Иргэд угаарын хийнд хордсон асуудлаар Нийслэлийн Онцгой комисс өнөөдөр дахин хуралдлаа. Хурлын дараа Засаг даргын орлогч Ж.Батбаясгалан мэдээлэл өгөв.

Нийслэлийн Засаг даргын тамгын газраас өчигдөр өгсөн мэдээллээр угаартсан гэсэн оноштойгоор 16 хүн эмнэлэгт хандан эмчлүүлж байснаас дөрвөн хүн нас барсан тухай мэдээллийг бид хүргэсэн билээ.

Нийслэлийн Засаг даргын орлогч Ж.Батбаясгалан “Хүний амь нас хохирсон хэрэг бүрт хэрэг үүсгэн шалгаж байна. Иргэдийн хордсон байж болзошгүй газруудаас дээж аван шинжилгээнд хамруулах ажил явагдаж байна. Мөн сайжруулсан түлшний барьцалдуулагч бодисноос дахин дээж авах ажлыг хийж байна. Өнөөдрийн байдлаар 30 орчим мянган тонн сайжруулсан түлш хэрэглээнд нийлүүлэгдээд байгаа. 

Энэ сарын 3-5-ны хооронд 35 иргэн угаартсан байж болзошгүй байдлаар эрүүл мэндийн байгууллагад хандаад байна.

Яг одоогийн байдлаар 6 иргэн хэвтэн эмчлүүлж байна. Дөрвөн хүн нас барсан. Эмнэлэгт хэвтэж буй 6 хүний нэгийнх нь биеийн байдал хүнд байна. Биеийн байдал хүнд байгаа нэг хүн 16 настай хүүхэд байна.

Сайжруулсан түлшний 95 хувь нь нэг удаа угаагдсан Өмнөговиос ирсэн нүүрс. Үлдсэн 5 хувьд нь импортоор оруулж ирж буй барьцалдуулагч (2.5%) болон шохой зэрэг бодисоос бүтэж байгаа бөгөөд эдгээрийг цаг тухай бүрт нь шинжилгээнд хамруулж байсан" гэлээ.

Мөн тэрээр үргэлжлүүлэн “Жил бүрийн өдийд иргэд угаарын хийнд хордох явдал гардаг. Өөрөөр хэлбэл ямар ч түлшнээс угаарын хий ялгардаг. Гэхдээ бид сайжруулсан түлшийг нэмж гурван төрлийн шинжилгээнд хамруулж байна. Барьцалдуулагч бодисыг мөн давтан шинжлүүлж байна. Өмнө нь Монгол Улсын бүх шинжилгээний лабораторид сайжруулсан түлшийг шинжлүүлсэн. Бид иргэд дээрээ туршилт явуулна гэж байхгүй" гэв.

Харин нийслэлийн мэргэжлийн хяналтын газраас хордсон байж болзошгүй иргэдийн хэрэглэсэн түлшийг шинжилгээнд өгсөн бөгөөд 2-3 цагийн дараа шинжилгээний хариу гарна. Хариу гарсны дараа мэдээлэл өгнө гэлээ. Нийслэлийн Онцгой комиссоос шуурхай штаб байгуулан ажиллаж байгаа аж. 

Мөн "Иргэд зуухаа буруу суурилуулах, яндан нам байх, яндан таггүй байх, зуухыг мөн агаар сэлгэлт сайтай газар байршуулахгүй байх зэрэг хэрэглээний горимын алдаа их байна. Хордсон айлуудын хувьд ихэнх нь ханан пийшинтэй айлууд байна. Өөрөөр хэлбэл ханан пийшинтэй айлууд утаа гадагшлах сувгаа шалгах шаардлагатай. Ийм хэрэглээний горим алдагдаж байгаагаас иргэд эрүүл мэнд, амь насаа хохироож байх вий гэж таамаглаж байна" гэж Нийслэлийн Онцгой комиссоос мэдээллээ.

НМХГ-аас Таван толгой Түлш ХХК-д энэ оны долоодугаар сард гаргасан шинжилгээний хариуг хүргэж байна.