Энэ асуултыг Засгийн газар өмнөө тавиад байна.

Өнөөдрийн байдлаар Архангай, Булган, Хөвсгөл, Орхон, Дархан-Уул аймагт ургац хураалт хэвийн буюу 41-59 хувьтай. Харин Сэлэнгэ, Төв аймагт таримлын болц оройтсон зэргээс дөнгөж эхэлж байгаа тухай өнөөдөр Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Тиймээс ургац хураалтыг технологийн хугацаанд нь шуурхай зохион байгуулах үүднээс оюутан, цэргийн албан хаагчдын ургац хураалтад ажиллах хугацааг 14-20 хоног сунгахаар болж байгаа юм байна. Гэхдээ үүнийг эцэслэн шийдээгүй, асуудлыг судалж хариу өгөхийг салбар хариуцсан сайд нарт даалгажээ.

Мөн хүнсний ногоон дээр дотоодын үйлдвэрлэлээ дэмжих үүднээс энэ жилээс эхлэн импортын хүнсний ногооны гаалийн албан татварыг жил бүрийн наймдугаар сарын 1-ний өдрөөс арванхоёрдугаар сарын 31-нийг хүртэлх хугацаанд 30 хувь болгож нэмэгдүүлэх асуудал бас Засгийн газрын судалгаанд буюу сайд нарын эрх мэдэлд очив. Импортын татварыг нэмэгдүүлснээр үйлдвэрлэгчдээ дэмжиж чадах уу, эсвэл  үнийн хөөрөгдөл үүсгээд хэрэглэгчдийнхээ нуруун дээр давхар ачаа үүрүүлэх болов уу? Ирэх долоо хоногийн Засгийн газрын хуралдаанд сайд нар үр дүнгээ танилцуулах юм байна.

Өнөөдөр Засгийн газрын хуралдаанд танилцуулсан урьдчилсан балансаар 442 мянган тонн үр тариа, үүнээс 420 мянган тонн буудай, 177 орчим мянган тонн төмс, 91 мянган тонн хүнсний ногоо, 38 мянган тонн тосны ургамал, малын тэжээлийн ургамал 80 мянган тонныг хураан авах боломжтой гэсэн тооцоо гарчээ.