Ерөнхий сайд Н.Учралын Засгийн газар 100 дахь хоногоо тэмдэглэж байна. Ерөнхий сайд өөрөө гарч ирээд өнгөрсөн 100 хоногт хийсэн ажлаа тайлагнахыг бүгд харж сонсож уншиж байгаа биз ээ. Тэрбээр хэлэхдээ “Чөлөөлөлт” үндэсний санаачилгыг хэрэгжүүлсэн гэв. 100 хоногт 100 чөлөөлөлт хийсэн гэв. Татварын шинэчлэл, Эдийн засгийн эрх чөлөөний хууль зэргийг батлуулсан, данс нээсэн, 9376 хяналтыг цуцалсан зэргээ санууллаа. Өрсөлдөх чадвараараа дэлхийн 79 орноос 69 дүгээрт явж байна. Инфляци 11,2 хувь хүрч өрхийн амьжиргаа төдийлөн сайжрахгүй байгаа гэв. Бас зэсийн үйлдвэр барих, гангийн үйлдвэртэй болох тухайгаа санууллаа.

Мөн Засгийн газрын сайдууд нь хийсэн ажлаа тайлагнацгаав. Сангийн сайд З.Мэндсайхан НӨАТ төлөгчийн босгыг 400 саяд хүргэсэн гээд нөгөө татварын шинэчлэл болох хоёр сая төгрөгөөс доош орлогoд нэг хувийн татвар авах тухайгаа ярив. Мөн Аж үйлдвэр эрдэс баялгийн сайд Г.Дамдинням шатахууны 33 хоногийн нөөц байгаа, шатахуун тасрахгүй гэлээ. Засгийн газрын яг 100 дахь хоног дээр шатахуун тасалдах байдалд хүрсэн нь Ерөнхий сайдын шүдний өвчин болоод байгаа бололтой байна. 33 хоноод яах юм, хойно урдаас шатахуун орж ирэх үү гэх зэрэг асуудлууд бүрхэг л өнгөрч байх шиг. Засгийн газрын 100 дахь хоног дээрээ шатахуунгүй сууж байна гэж хэлүүлчих вий гэхээс орох байх газраа олж чадахгүй байгаа шинж харагдана. Яг шатахуунтай эсэх нь бүрхэг байсаар энэ гайтай 100 дахь хоногийг өнгөрөөх болов уу. Дараа нь бол яасан ч яах вэ гэж үзэж байгаа бололтой.

Бид Засгийн газрын 100 дахь хоног гэгчийг 2024 оноос хойш гурав дахь удаагаа тэмдэглэж байгаа нь энэ юм. Засгийн газрын 100 дахь хоног бүр хийсэн ажилгүй, хийгдэх ажил нь ирээдүй цаг дээр яригдсаар ирсэн нь гунигтай. 2024 онд сонгууль болоод МАН ялалт байгуулаад Л.Оюун-Эрдэнийн Засгийн газрын 100 дахь хоногийг тэмдэглэсэн. Тэгэхэд бас л бүх ажил ирээдүй цаг дээр байв. Гэхдээ тэр үед бас ч гэж өрнүүн байлаа. Алдарт 14 мега төсөл ид яригдан АН-тай хамтарсан засаг байгуулчихсан ирээдүй гэгээн мэт харагдаж байв. Гэсэн ч МАН энэ засгаа элдэвээр хэлэн буулгасан юм. Нөгөө яригдаад байсан бүх юм будаа. Хувхайгаараа эргэсэн хоосон цаг эхлэв. Дараа нь Занданшатарын Засгийн газрын 100 дахь хоног боллоо.

“Цэцгэрэх хөдөлгөөн” гэдэг хоосон үгнээс өөр юу ч хийсэнгүй. Энэ Засгийн газрын 100 дахь хоногоор ямар дүгнэлт өгч байгаа талаараа сөрөг намын лидер Л.Гантөмөр ингэж хэлж байв. Тэрбээр “Г.Занданшатарын ЗГ байгуулагдсан 100 хоногт маш муу ажилласан. Ажлаа хийхгүй байна. Засгийн газар шинэ ПР бодоод, шинэ бодлого боловсруулах гэж оролдоод, шинэ “дугуй” зохиох гэж оролдох л юм бол будилна” гэж хэлж байсан нь хэвлэлийн хуудаснаа үлджээ. Л.Гантөмөр Ардчилсан намын дарга, хамтарсан Засгийн газрын тэргүүн шадар сайдаар ажиллаж байгаад Г.Занданшатарын засагт халаагаа өгсөн үе байлаа. Тэгэхээр юу хийх ёстой байсан юу хийвэл дээр байх талаар хэлж чадах хүний нэг юм. Одоо дахиад Засгийн газрын “100 дахь хоногийг” тэмдэглэж байна. Хийнэ гэсэн юмнууд нь дан ирээдүй цаг дээр яригдаж бүтэх эсэх нь тодорхойгүй байдаг л нэг арга хэмжээ болж өнгөрч байна даа. Бүх татварын шинэчлэл нь ирээдүй цаг дээр ирэх жилээс дараагийн жилээс нэг юм хэрэгжиж эхлэх юм гэсэн.

Одоо бол ард түмний амьдралд хэрэг болох юм огт харагдахгүй байна. Нөгөө гол “чөлөөлөлт” гэдэг нь яг амьдрал дээр биелж байгаа юм алга. Харин ард түмнээс татвар авах нь шууд газар дээрээ биелж байна. Гараашийн татвар нэхэгдэж байна, зам ашигласны татвар наймдугаар сарын 1-нээс эхэлнэ гэх мэтээр. Тээврийн цагдаа ард түмнээ торгох нь бүр төгсөрч хээр байгаа шатахуун түгээх газар дээр суурин гэсэн тэмдэг хуурамчаар байрлуулан хурд хэтрүүллээ хэмээн торгож байна гэж хүртэл яригдаж байна. Зам ашигласны төлбөр 10 дахин буюу мянган хувиар нэмэгдсэн л “100 хоног”-ийн гол ажил болж байх шиг. Товчооны цаана байгаа зусландаа очих арга байхгүй болсны баяр гэж тэмдэглэх юм уу хаашаа юм.

Өдрийн сонин