Орон сууцны үнийн индекс энэ оны хоёрдугаар сард өмнөх оны мөн үеийнхээс 10.2 хувиар нэмэгдсэнийг Үндэсний статистикийн хороо мэдээллээ.

Шинэ орон сууцны үнэ өнгөрсөн оны мөн үеийнхээс 10.9 хувиар нэмэгдэж, өмнөх сарынхаас 2.8 хувиар буурсан бол хуучин орон сууцны үнэ өнгөрсөн оны мөн үеийнхээс 9.6 хувиар нэмэгдэж, өмнөх сарынхаас 0.4 хувиар багасжээ.

Хоёрдугаар сард шинэ орон сууцны нэг метр квадрат талбайн дундаж үнэ 4.76 сая төгрөг болж, Сүхбаатар дүүрэгт хамгийн их буюу 6.25 сая төгрөг байв. Шинэ орон сууцны дундаж үнэ өнгөрсөн оны мөн үеийнхтэй харьцуулахад Сүхбаатар дүүрэгт 11.4 хувь буюу 637.1 мянган төгрөгөөр нэмэгдэж, Чингэлтэй дүүрэгт 1.4 хувь буюу 60.5 мянган төгрөгөөр багассан байна.

Өнгөрсөн сард хуучин орон сууцны нэг метр квадрат талбайн дундаж үнэ 5.03 сая төгрөг болж, Сүхбаатар дүүрэгт хамгийн их буюу 6.22 сая төгрөг болжээ. Хуучин орон сууцны дундаж үнэ өнгөрсөн оны мөн үеийнхтэй харьцуулахад Хан-Уул дүүрэгт 14.4 хувь буюу 690.7 мянган төгрөгөөр нэмэгдэж, Чингэлтэй дүүрэгт 2 хувь буюу 108 мянган төгрөгөөр багасав.

Орон сууцны нэг метр квадрат талбайн дундаж үнийг байршлаар нь харвал, Сүхбаатар дүүргийн 220 мянгат орчимд 9.46 сая байгаа нь хамгийн их, Сонгинохайрхан дүүргийн 5 шар орчимд 3.18 сая төгрөг байгаа нь хамгийн хямд байна.

Туршилт тооцоогоор, энэ оны хоёрдугаар сард нэг өрөө орон сууцны нэг сарын түрээсийн дундаж үнэ 1.28 сая, хоёр өрөө орон сууцных 1.85 сая, 3 өрөө орон сууцных 3.01 сая төгрөг байв. Орон сууцны нэг сарын түрээсийн дундаж үнийг байршлаар нь харвал Сүхбаатар дүүргийн төв талбай, 220 мянгат орчимд 1-3 өрөө байр 1.40-4.61 сая байгаа нь хамгийн их, Сонгинохайрхан дүүргийн 5 шар орчим 1.0-1.5 сая төгрөг байгаа нь хамгийн хямд байлаа.