ХХААХҮ-ийн сайд М.Бадамсүрэн зүүн бүсийн иргэдийг эх орны хөрсөнд ургасан эрүүл хүнсний ногоогоор хангах, усалгаатай газар тариаланг хөгжүүлэх ач холбогдол бүхий төслийг дахин сунгасан гэрээний хугацаанд буюу тавдугаар сарын 20 гэхэд дуусгахыг үүрэг болгов.
ХХААХҮ-ийн сад Хэнтий аймагт ажиллаж, Хэрлэн сумын ногоочин, тариаланч, аймаг орон нутгийн удирдлага, Дулааны талын 700 га-гийн услалтын системийн төслийн нэгж, гүйцэтгэгч компанийн төлөөлөлтэй уулзсаныг тус яам мэдээллээ.
ХХААХҮ-ийн сайд М.Бадамсүрэн уулзалтад оролцогчдын мэдээлэлтэй танилцсаны дараа “Жинсийн орой” ХХК-ийн удирдлагад гэрээний хугацааг дахин сунгахгүй гэдгийг сануулав. Цаашид услалтын системийг сум, орон нутаг хариуцаж бүрэн хүчин чадлаар нь ашиглах, орон нутгаас хийж хэрэгжүүлэх ажлын төлөвлөгөөг нарийвчлан боловсруулах, үйлчилгээний төлбөр, ашиглалтын зардлыг журмын дагуу батлуулах, төсөл хэрэгжүүлэх нэгж сум, иргэд тулгарч буй асуудлыг хамтран шийдэж ажиллахыг албаныханд чиглэл болгожээ. Тэрбээр өнгөрсөн нэгдүгээр сард Хэнтий аймагт ажиллах үеэрээ тус төслийн барилга угсралтын явцтай танилцаж, хариуцлагагүй ажиллаж буй гүйцэтгэгч компанид хатуу шаардлага тавьж, хар жагсаалтад оруулах хүртэл арга хэмжээ авахаа илэрхийлж, төслийг яаралтай ашиглалтад оруулахыг үүрэг болгож байв.
Төслийг хэрэгжүүлэхээр ХХААХҮ-ийн сайд, Хэнтий аймгийн Засаг дарга нар 2025 оны зургадугаар сард хамтын ажиллагааны гэрээ байгуулжээ.
