Манай улсын хувийн хэвшлийн төлөөлөгчдөд зориулан, Монгол Улс болон Евразийн эдийн засгийн холбоо (ЕАЭЗХ) хоорондын худалдааны эргэлтийг нэмэх, бизнес эрхлэгчдэд тулгардаг техникийн саад бэрхшээлийг арилгах семинарыг ОХУ-ын Москва хотноо зохион байгууллаа.

УИХ-ын дарга Н.Учрал болон ЕЭЗК-ын Удирдах зөвлөлийн дарга Бакытжан Сагинтаев нар "1+9" хоёр талын уулзалт хийж, эдийн засгийн хамтын ажиллагааны стратегийн асуудлыг хэлэлцэв. Үүний дараа ЕЭЗК-ын Худалдаа хариуцсан сайд Андрей Слепнёв семинарыг нээж, Монгол Улс ЕАЭЗХ хооронд байгуулсан Худалдааны түр хэлэлцээрийн гол заалт, хэтийн төлөв, хэлэлцээр хүчин төгөлдөр болох хугацааг танилцуулсныг МҮХАҮТ мэдээллээ.

Семинарын үеэр ОХУ-ын салбар хариуцсан удирдах албан тушаалтнууд Монголын бизнес эрхлэгчдэд танилцуулга хийв. ОХУ-ын Хөдөө аж ахуйн дэд сайд М. Маркович хэлсэн үгэндээ хөдөө аж ахуйн гаралтай бүтээгдэхүүний худалдааг дэмжих нь хоёр улсын эдийн засгийн тэргүүлэх чиглэл учир энэ салбарт хамтын ажиллагааны асар их нөөц боломж байгааг тэмдэглээд, Монгол Улсаас нийлүүлж буй бараа бүтээгдэхүүний нэр төрөл, хэмжээг нэмэхэд Оросын тал бэлэн гэдгийг илэрхийлжээ.

Монголын экспортлогчдод тулгардаг гол асуудлын нэг болох хяналт шалгалтын талаар Мал эмнэлэг, ургамал хамгааллын холбооны албаны төлөөлөгч А.Даушев танилцуулахдаа амьтан, ургамлын эрүүл ахуйн (SPS) шаардлага хангах, олон улсын стандартад нийцсэн баталгаажуулалтыг хэрхэн хийх талаар бизнес эрхлэгчдэд зөвлөгөө өгсөн юм.

Түүнчлэн Холбооны итгэмжлэлийн албаны дарга Д. Волвач ЕАЭЗХ-ны гишүүн орнуудын зах зээлд заавал мөрдөх техникийн зохицуулалтыг тайлбарлахдаа, бүтээгдэхүүний тохирлын үнэлгээг зөв хийлгэх нь бараа бүтээгдэхүүн саадгүй нэвтрэх үндэс болохыг онцоллоо.

Худалдааны эргэлтийг хурдасгахад гаалийн байгууллагын үүрэг оролцоо чухлыг Холбооны гаалийн албаны дэд дарга С. Шкляев дурдаад, гаалиар бараа нэвтрүүлэх шаардлагуудыг танилцуулж, бичиг баримтын бүрдүүлэлтийг цахимжуулж хугацаа хэмнэх, хүнд суртлыг багасгах арга замыг танилцуулав.

Семинараар орчин үеийн цахим зах зээлийн давуу талыг онцолж байлаа. Евразийн хамгийн том онлайн платформ "Wildberries" компанийн Төслийн албаны дарга М. Андреев Монголын үйлдвэрлэгчид борлуулалтаа хил хязгааргүй нэмэх бодит гарцуудыг хэлж байлаа.

Талууд хувийн хэвшлийнхэнд тулгарч буй асуудлыг хэлэлцсэнээрээ тус семинар нь монголын бараа бүтээгдэхүүний Евразийн зах зээлд өрсөлдөх чадварыг нэмэх, экспортлогчдод төр, олон улсын байгууллагаас үзүүлэх дэмжлэгийг тодорхой болгосон алхам болжээ. Үүнд МҮХАҮТ-ын гишүүн, Монголын хүнсний үйлдвэрлэлийн салбарын 30 гаруй бизнес эрхлэгч хамрагдаж, экспортын шинэ гарц, боломжийн талаар туршлага судалжээ.