Олон улсын “Чингис хаан” нисэх буудлыг 1.6 сая зорчигчдод үйлчлэх хүчин чадалтай барьсан ч өнгөрсөн онд 2.4 сая зорчигч тээвэрлэжээ.

Энэчлэн нислэг, зорчигчийн тоо нэмэгдсээр байгаа тул нисэх буудлын өргөтгөлийг яаралтай эхлэх шаардлагатайг Зам, тээврийн сайд Б.Дэлгэрсайхан Япон Улсаас Монгол Улсад суугаа Элчин сайд Игавахара Масарү, Японы Олон улсын хамтын ажиллагааны байгууллага ЖАЙКА-гийн төлөөлөгчдийг хүлээн авч уулзах үеэрээ тодотголоо.

Уулзалтаар Японы Засгийн газраас манай улсад үзүүлж буй иений хөнгөлөлттэй зээлээр “Чингис хаан” олон улсын нисэх буудлын өргөтгөл барих, хүчин чадлыг нэмэхэд тулгамдаж буй асуудлаар санал солилцсоныг ЗТЯ мэдээлэв.

Сайд Б.Дэлгэрсайхан, Олон улс болон орон нутгийн нислэгийн тоо нэмэгдэж ачаалалтай байгаагаас ачаа тээш олгох цэгт үйлчлүүлэгч дугаарлаж хүлээх, орон нутгийн нислэгийн цаг хойшлох зэрэг бэрхшээл тулгараад байгааг дурдаад, нөхцөл байдлыг харгалзан үзэж, талууд гэрээг өөрчлөх хүсэлтэй байгааг Японы талд уламжиллаа. Төслийн бүтээн байгуулалтыг эрт эхлэх, төлөвлөсөн хугацааг богиносгон төлөвлөлт, судалгааг 2039 оноор тооцон бэлтгэлээ эрчимжүүлэхийг хүсэв.

Мөн өнгөрсөн оны байдлаар манай улс олон улсын 56 чиглэлд нислэг үйлдэж, агаарын 50 хэлэлцээр байгуулаад байна. Транзит нислэгээр зорчих иргэдийн тоо нэмэгдэж байгаа тул төр хувийн хэвшлийн түншлэлээр нисэх буудлыг түшиглэн транзит зочид буудлыг богино хугацаанд барихаар төлөвлөснөө хэлсэн юм.

Түүнчлэн, “Нью Улаанбаатар Интернэйшнл Эйрпорт” ХХК-ийн олон улсын нислэгийн буух, хөөрөх хураамж 17 мянган төгрөг байсныг энэ онд 18 ам.доллар болгож огцом нэмсэн. Олон улсын геополитикийн нөхцөл амаргүй байгаагаас онгоцны түлшийг үнэтэй авч байгаа. “МИАТ” ТӨХК 10 тэрбумын алдагдалтай ажиллаж байна. Ийм үед нислэгийн хураамжийг 3-4 дахин нэмсэн нь зорчигчийн тийзний үнэ нэмэх зэрэг бэрхшээл үүсгэж болзошгүй тул талууд харилцан санал солилцож, үе шаттай нэмж зохицуулах санал дэвшүүлэв.

Монгол Улсад суугаа Япон Улсын Элчин сайд Игавахара Масарү “ЖАЙКА-гийн төлөөлөгчид “Чингис хаан” олон улсын нисэх буудлын өргөтгөл барих бэлтгэлээ эрчимжүүлж байгаа. Төслийн барилгыг эрт эхлүүлэхэд карго теминалын зураг төсөл, барилга барих зардлыг хэрхэн төлөвлөх, хаанаас гаргах эсэхээ дахин хэлэлцэх шаардлагатай”-г хэллээ.

Уулзалтаар хэлэлцсэн зарим асуудлыг ирэх баасан гарагт дахин хэлэлцэхээр тогтжээ.