Аж үйлдвэр, эрдэс баялгийн яамнаас ЭЗХЯ, АМГТГ, Уул уурхайн ассоциацтай хамтран “Уул уурхайн салбарын 7 хоног”-ийг зохион байгуулж байна.

Энэ нь Засгийн газрын бодлогын хүрээнд уул уурхайн салбарын хөрөнгө оруулалтыг сайжруулах, тэдний хууль ёсны эрх ашгийг хамгаалах, төр-хувийн хэвшлийн хамтын ажиллагааг бэхжүүлэх зорилготой юм.

Долоо хоногийг эхлүүлж, АҮЭБ-ийн сайд Г.Дамдинням хэлэхдээ, “Уул уурхайн салбарынхан олборлолтоос боловсруулалт руу шилжиж, нэмүү өртөг шингэсэн бүтээгдэхүүн үйлдвэрлэж экспорт, татварын орлогыг нэмэхээр олон талт бодлогын өөрчлөлт хийж байна” гээд салбарын эдийн засагт үзүүлж буй нөлөөг танилцуулав.

Тодруулбал, уул уурхайн салбар нь нь ДНБ-ий 26, аж үйлдвэрийн бүтээгдэхүүний 79 хувийг, мөн экспортын орлогын 95.4, гадаадын шууд хөрөнгө оруулалтын 74, нэгдсэн төсвийн орлогын 28.4 хувийг тус тус бүрдүүлдэг байна. Манай улсад 2015-2024 онд гадаадын 99.38 их наяд төгрөгийн хөрөнгө оруулсны 80 орчим хувь нь уул уурхайн салбарт ногдож байгааг АҮЭБЯ мэдээлжээ.

Ирэх жилүүдэд уул уурхай, аж үйлдвэрийн бодлогоо болон Ашигт малтмалын тухай хуулийг өөрчлөхөөр зэхэж байгааг сайд дурдлаа. Хуулийн нэмэлт өөрчлөлтийн үзэл баримтлалын талаар энэ долоо хоногт олон нийтээс санал авах ажээ.

Тэрбээр “Ашигт малтмалын тухай хуульд нэмэлт өөрчлөлт оруулахын сацуу анхдагч болон дагалдах хэд хэдэн хуулийг бэлтгэж байгаа. Үүний дараа Хүнд үйлдвэрийн тухай, Газрын тосны тухай, Газрын тосны бүтээгдэхүүний тухай хуулийг шинэчлэн найруулж өөрчлөх юм. Өөрөөр хэлбэл, уул уурхайн салбарт боловсруулалт хийж нэмүү өртөг шингээж эцсийн бүтээгдэхүүн үйлдвэрлэхийг зорьж байна. Ухаад ачиж гаргадаг бус боловсруулаад эцсийн бүтээгдэхүүн хийдэг болж өөрчлөх ёстой. Ингэснээр байгалийн баялгийн өгөөжийг илүү улс орондоо шингээнэ. Дээрх хууль нь бусад яамнаас гаргаж буй Хөрөнгө оруулалтын болон Бизнес эрхлэгчдийг дэмжих тухай хуулийн үндсэн агуулгатай дүйж, Засгийн газрын бодлогын суурь нь болно” гэв.

УИХ-ын хаврын чуулганд өргөн барихаар зэхэж буй Ашигт малтмалын тухай хуульд хэд, хэдэн чухал өөрчлөлтийг оруулахаар тусгажээ. Тухайлбал,

Ашигт малтмалын хайгуулын тусгай зөвшөөрлийг олгох сонголт бий болгох юм. Хайгуулын тусгай зөвшөөрлийг өргөдөл, сонгон шалгаруулалтаар олгож, авах нь хялбар болсон ч хэрэв хайгуул хийхгүй хадгалбал хүндрэлтэй, үнэтэй байх зохицуулалт хийнэ.

Хуулийн төсөлд чухал ашигт малтмалын зохицуулалтыг тусгана. Дэлхий нийт өндөр технологийн түүхий эд чухал ашигт малтмалын талаарх бодлого тодорхойлж, энэ төрлийн хайгуул, олборлолт, баяжуулалт, боловсруулалтын төслүүд хэрэгжүүлж байна. Манай улс ч чухал ашигт малтмалынхаа жагсаалтыг баталж дэлхийн чиг хандлагад нийцсэн бодлогоо тодорхойлно.

АМНАТ тооцох аргачлалыг шинэчилж, орон нутгийнхан хүртэх хүртээмжийг нэмнэ. АМНАТ тооцох жишиг үнийг Монголын Хөрөнгийн бирийн үнээр тогтоох, зэсийн АМНАТ-ын өсөн нэмэгдэх төлбөрийг олон улсын жишигт нийцүүлэх, баяжуулах, боловсруулах үйлдвэрийн бүтээгдэхүүнд ногдох АМНАТ-ийг оновчтой тогтоож, нэмүү өртөг шингэсэн бүтээгдэхүүн үйлдвэрлэлийг эрчимжүүлэх юм. Мөн баяжмалд дагалдаж буй элементэд ногдуулах АМНАТ-ыг олон улсын жишигт нийцүүлэх, ашигт малтмал ашиглах үйл ажиллагаа явуулж буй аймаг, орон нутагт АМНАТ-ыг илүү хуваарилах өөрчлөлтийг тусгажээ.