Өнгөрөгч мягмар гариг буюу нэгдүгээр сарын 20-ны өдөр Дулааны IV цахилгаан станцын дөрөвдүгээр зууханд гэмтэл гарч, нийслэлийн хэмжээнд цахилгааны хязгаарлалт хийхэд хүрсэн. Нийслэлийн цахилгаан хэрэглээний 58 хувийг дангаараа хангадаг тус станц нөөц тоноглолгүй, бүрэн хүчин чадлаараа ажиллаж байх үед гэмтэл гарчээ.

Станцын хүчин чадлыг өргөтгөх техник, эдийн засгийн үндэслэлийг хоёр жилийн өмнө баталсан ч өнөөг хүртэл ажил хэрэг болгоогүй нь осол гарах үндэс болсон байна. Гагнуурчин, засварчин зэрэг нарийн мэргэжлийн 15 хүний бүрэлдэхүүнтэй баг хүний амь насанд эрсдэлтэй буюу +70 хэм хүртэл халуунд ажиллаж, гэмтлийг богино хугацаанд бүрэн засжээ. 

Өнөөдрийн байдлаар эрчим хүчний нэгдсэн сүлжээний ачаалал тогтворжиж, хэвийн горимд шилжээд байгаа ч өвлийн ид ачааллын үед гарсан энэ осолтой холбоотойгоор салбар хариуцсан сайд нарт хариуцлага тооцох асуудал хөндөгдөж байна. УИХ дахь АН-ын бүлгийн дарга, гишүүд мэдэгдэл хийж, Эрчим хүчний сайд Б.Чойжилсүрэн, Онцгой байдлын асуудал эрхэлсэн Шадар сайд Х.Ганхуяг нарт хариуцлага тооцож, албан тушаалаас нь огцруулах шаардлага тавилаа. Хуулиараа танхимынхаа сайд нарт хариуцлага тооцох эсэх нь Ерөнхий сайдын бүрэн эрхийн асуудал болсон.

Г.Занданшатарын Засгийн газрын хувьд байгуулагдаад хагас жил гаруйхны хугацаа өнгөрсөн ч чамгүй бэрхшээлийг туулж байна. Намын даргын сонгуулиас болж УИХ-ын даргатайгаа зөрчилдсөний улмаас огцрохдоо тулж, Цэцийн шийдвэрээ торж үлдсэн Засгийн газар нийгэм, эдийн засгийн болоод улс төрийн хувьд багагүй саад тотгорыг туулж яваа. Нэг талаас намын дотоодоос явуулж буй хатгаас, нөгөө талаас сөрөгч хүчний зүгээс тавьж буй шаардлагууд гэх мэт. 

Гэхдээ энэ удаагийн тохиолдолд АН-ын бүлгээс тавьж буй шаардлага нь үндэслэл бүхий бөгөөд иргэд, олон нийтийн эрх ашигт хамаатай үйлдэл болж байна.  Ялангуяа Эрчим хүчний сайдаар дөрвөн жил завсаргүй ажиллаж байгаа Б.Чойжилсүрэнгийн хувьд. Хоёр жилийн өмнө ТЭЗҮ-ийг нь баталсан станцын өргөтгөл яагаад хийгдээгүй тухайд салбарын сайд нь хариуцлага хүлээх нь зайлшгүй.

Дээр нь түүнийг сайдаар ажиллаж байхад ТНБД-аар нь ажиллаж байсан, сүүлд ДЦС ТӨХК-ийн захирлаар ажиллаж байсан Н.Тавинбэх нарын холбогдсон авилга, албан тушаалын хэрэг эрчим хүчний салбарыг бүхэлд нь ганхуулж мэдэхээр үйл явдал болоод байна. Салбар хариуцаж байгаа сайд хүн өөрийнхөө өмнөөс төдийгүй томилсон албан тушаалтныхаа өмнөөс хариуцлага хүлээх ёстой. Мөн түүнчлэн "Хоёр жилийн дараа Монгол Улс эрчим хүч экспорлогч болохгүй бол би ажлаа өгнө" гэж мэдэгдсэн Шадар сайд Т.Доржхандтай ч гэсэн хариуцлага ярихад буруутахгүй л болов уу.

Сүүлийн 30 гаруй жил алдагдалтай ажиллаж ирсэн эрчим хүчний салбарыг дампуурлаас гаргахын тулд УИХ-ын гишүүд санаачлаад хэрэглэгчид очиж байгаа дулаан, цахилгааны үнийг 2-3 дахин нэмэгдүүлсэн. Авч энэ нэмэгдэл эрчим хүчний салбарт шингэсэнгүй. Эсрэгээрээ энэ салбарт хийгдсэн хөрөнгө оруулалт эрх мэдэл бүхий хэдхэн хүний халаасыг зузаалахад хүрсэн нь баримтаар ил гарав. Энэ тохиолдолд, салбарын сайдтай хариуцлага ярихгүй бол өөр хэнтэй ярих билээ. 

Г.Занданшатарын хувьд байгуулагдаад удаагүй танхимынхаа сайд нарыг ойр ойрхон сэлгэх нь улс төрийн хувьд хохиролтой байж болох ч түүнээс наана, нэн тэргүүнд нь улс орны, иргэдийн нийтийн эрх ашиг гэж бий. Тэр тусмаа хариуцлага, сахилга бат гэдэг зүйлийг хамгийн их сануулж, ярьж ирсний хувьд Ерөнхий сайд нь тэргүүлээд хэлсэн үгэндээ эзэн байх ёстой. Тэгэхгүй бол өмнөх хугацаанд Ерөнхий сайдын хэлж ярьсан, зарласан бодлого бүхэлдээ хаданд хашгирсан цуурайнаас ялгаагүй болж үлдэнэ.

Б.ЗАЯА