Монголбанкны Мөнгөний бодлогын хороо ээлжит бусаар хуралдаж, шийдвэрээ танилцууллаа.

Ингэхдээ банкнаас иргэдэд шинээр олгох болон нөхцөлийг нь өөрчлөх хэрэглээний зээлийн өр орлогын харьцааны дээд хязгаарыг 45 хувиар шинэчлэн тогтоолоо. Мөн банкуудын төгрөг болон гадаад валютын заавал байлгах нөөцийн хувь хэмжээг нэг нэгж хувиар нэмэх шийдвэр гаргасан байна.

Монголбанкны ерөнхийлөгч С.Наранцогт сэтгүүлчдийн асуултад хариулахдаа, “Хоёр үе шаттай бүтцийн өөрчлөлт хийнэ. Би ажлаа аваад сар гаруй хугацаа өнгөрч байна. Энэ хооронд Монголбанкийн дунд хугацаанд баримтлах стратеги, бодлогын хувьд хэрэгжүүлэх бодлогоо тодорхойлохоос гадна бүтэц зохион байгуулалт, бүтээмжийг нэмэгдүүлэх, олон улсын Төв банкны жишигт нийцэхүйц бүтэц хийж байна. Энэ шийдвэр удахгүй албажна. Бүтэц зохион байгуулалтын хувьд нэлээд цэгцэрнэ. Энэ ажил хоёр үе шаттай байх бөгөөд эхний ээлжид бүтцийн хувьд зөв бүтээмжтэй, ухаалаг зохион байгуулалттай болно” хэмээн ярилаа.

Монголбанкнаас банкны системийн зээлийн өсөлтийг зохистой түвшинд хадгалж, санхүүгийн тогтвортой байдлыг хангах бодлогыг үргэлжлүүлэн хэрэгжүүлж байгаа аж. Хэдийгээр мөнгөний хатуу бодлого үргэлжилж байгаа ч зээлийн өсөлт өндөр түвшинд хадгалагдсаар байна. Тухайлбал, 2025 оны арваннэгдүгээр сарын байдлаар зээлийн үлдэгдэл өмнөх оны мөн үеийнхээс 21 хувиар өсжээ. Хэрэглээний зээлийн өсөлт нь эрэлтийн шалтгаантай инфляцыг өдөөх, бизнесийн зээлд шаардлагатай эх үүсвэрийг бууруулах, хэрэглээний импортыг тэтгэн ханш, төлбөрийн тэнцлийн дарамтыг нэмэгдүүлж болзошгүй. Түүнчлэн, эдийн засгийн гадаад орчны тодорхой бус байдал өндөр байгаа үед банкны системийн эрсдэл даах чадварыг нэмэгдүүлэх шаардлагатай.

Иймд Мөнгөний бодлогын хорооноос инфляцыг дунд хугацаанд зорилтот түвшинд тогтворжуулах, эдийн засаг, санхүүгийн салбарын тогтвортой байдлыг хангах зорилгоор дээрх бодлогын шийдвэрийг гаргажээ. Цаашид макро, санхүүгийн орчны төлөв хэрхэн өөрчлөгдөхөөс хамаарч Мөнгөний бодлогын хороо бодлогын дараагийн алхмыг тухай бүрд нь авч хэрэгжүүлэх ажээ.