Энэ оны есдүгээр сараас 12 дугаар сарын 19 хүртэлх хугацаанд Казахстан улс 3.9 сая тонн үр тариа экспортолсон тухай Хөдөө аж ахуйн яамны мэдээллийг эш татан Kazinform агентлаг мэдээлэв.
Өнгөрсөн оны мөн үед 3.4 сая тонн үр тариа экспортолсонтой харьцуулахад гадаад зах зээлд нийлүүлж буй хэмжээ тогтвортой өсөж байгааг дээрх тоо харууллаа.
Гол гол зах зээлүүд рүү хийсэн ачилт хамгийн ихээр өссөн байна. Тухайлбал, Узбекистанд экспортолсон үр тарианы хэмжээ 35 хувиар өсөж, 1 сая 774 мянган тоннд хүрсэн бол Киргиз улсад 122 мянган тонныг нийлүүлсэн нь хоёр дахин нэмэгдсэн үзүүлэлт юм. Түүнчлэн Афганистанд нийлүүлсэн үр тарианы хэмжээ 260 мянган тоннд хүрснээр 36,8 хувиар нэмэгдсэн байна.
Үр тариа экспортлогчид энэ онд шинэ ургацын үр тарианы ачилтыг хийж болох бөгөөд ингэснээр 2026 оны эхээр тээврийн зардлын нөхөн төлбөр авах боломжтой гэдгийг Хөдөө аж ахуйн яам сануулж байсан юм. Экспортлогчдыг төрөөс дэмжих бодлогын хүрээнд ирэх онд 30 тэрбум гаруй тенге төсөвлөсөн байна.
Зах зээлд үр тариаг хүргэхэд 30 хоног шаардлагатай тул ачилтыг идэвхжүүлэхийг экспортлогч компаниудад зөвлөжээ. Ирэх онд татаас авахын тулд үр тариаг хүлээн авах цэгт хүргэснийг нотлох баримт бичгүүдийг бүрдүүлэх ёстой.
