Аж үйлдвэр, эрдэс баялгийн яамнаас шатахууны асуудлаар мэдээлэл хийлээ. Аж үйлдвэр, эрдэс баялгийн дэд сайд Ч.Хишигдалай "Өчигдөр зарим ШТС үнийн самбараа өөрчлөөд евро-5 стандартын шатахуун зарж эхэлсэн. Үүнтэй холбоотойгоор АИ92 шатахууны үнэ нэмэгдлээ гэсэн мэдээлэл гарсан.

Бид өнгөрсөн сард 75 мянган тонн шатахуун захиалж, хэрэглэсэн. Харин энэ сард 85 мянган тонн шатахуун захиалж, хэрэглэж байна. Үүнтэй холбоотойгоор 25 мянган тонн Евро-5 стандартын шатахууныг ОХУ-аас худалдан авсан. Евро-5 стандартын шатахууныг хамгийн хямд үнээр гэхэд 800 ам.доллараар нийлүүлдэг. Тиймээс шатахууны үнэ зөрүүтэй байгаа юм.

Хоёрдугаарт, ОХУ-д шатахууны үнэ тодорхой хэмжээнд нэмэгдсэн. Үүнтэй холбоотойр мөн Евро-5 стандартын АИ-92 автобинзений үнэ нэмэгдсэн.

Шатахууны нийлүүлэлтийн талаар Монгол, ОХУ-ын Засгийн газар хоорондын комиссын хурал саяхан Улаанбаатар хотноо болсон. Хурлын үеэр шатахууны нийлүүлэлтийн асуудлыг ярилцсан. Үйлдвэрлэлийн процесс дээрээ асуудал үүсэж манай захиалгыг хурдан шуурхай нийлүүлж чадахгүй байгаа асуудал бий. Гэхдээ ойрын үед үүнийг зохицуулж жигдрүүлнэ гэдгээ амлаад буцсан. Үүнтэй холбоотойгоор АИ92 шатахууны нийлүүлэлт нэмэгдэж байна. Монгол Улс өдөрт 40 орчим вагон буюу 2200-2400 тонн шатахуун хэрэглэдэг. ОХУ энэ хэрэглээнээс давсан хэмжээгээр шатахуун нийлүүлж эхэлсэн учраас ойрын өдрүүдэд ШТС-уудын ачаалал буурна.

Дизель түлшний тухайд аравхоёрдугаар сард 135000 тонныг захиалсан. Өнөөдрийн байдлаар 90 орчим хувь нь орж ирсэн байна"гэв.