Гүйлгээнд гаргасан бэлэн мөнгө 2025 оны 11 дүгээр сарын эцэст урьдчилсан гүйцэтгэлээр 1.2 их наяд төгрөгт хүрчээ. Энэ нь 2024 оны мөн үеийнхээс 61.5 тэрбум төгрөгөөр нэмэгдсэнийг Үндэсний статистикийн хорооноос мэдээллээ.

Мөнгөний нийлүүлэлтийн 16.5 хувийг гадаад цэвэр актив, 83.5 хувийг дотоод цэвэр актив бүрдүүлж байна.

Гадаад цэвэр актив урьдчилсан гүйцэтгэлээр 7.6 их наяд төгрөгт хүрчээ. Энэ нь 2024 оны мөн үеийнхээс 1.4 их наяд төгрөгөөр буурчээ.

Дотоод цэвэр актив 38.2 их наяд төгрөгт хүрсэн байна. Энэ нь 2024 оны мөн үеийнхээс 5.7 их наяд төгрөгөөр нэмэгдсэн аж.

Төгрөгийн хадгаламж 24.7 их наяд төгрөгт хүрсэн байна. Энэ нь 2024 оны мөн үеийнхээс 3.7 их наяд төгрөгөөр илүү байна. Түүний 20.9 их наяд төгрөг нь иргэдийнх, 3.8 их наяд төгрөг нь аж ахуйн нэгж, байгууллагынх юм байна. Харин валютын хадгаламж 5.4 их наяд төгрөгт хүрсэн аж.

Нийт зээлийн үлдэгдэл 43.4 их наяд төгрөгт хүрчээ. Энэ нь 2024 оны мөн үеийнхээс 7.5  их наяд төгрөгөөр илүү гарчээ.

Зээлийн өрийн үлдэгдлийн 59.7 хувь нь иргэд, 39.0 хувь нь хувийн байгууллага, 0.5 хувь нь төрийн байгууллага, 0.8 хувь нь санхүүгийн байгууллага болон бусад гэсэн ангилалд байна.

Хэвийн зээлийн өрийн үлдэгдэл 39.3 их наяд төгрөгт хүрчээ, Хэвийн зээлийн өрийн үлдэгдэл нийт зээлийн өрийн үлдэгдлийн 90.5 хувийг эзэлж байна.

Анхаарал хандуулах зээлийн өрийн үлдэгдэл 1.8 их наяд төгрөгт хүрсэн аж. Тухайн төрлийн зээлийн өрийн үлдэгдэл нийт зээлийн өрийн 4.0 хувийг эзэлжээ.

Чанаргүй зээлийн өрийн үлдэгдэл 2.4 их наяд төгрөгт хүрчээ. Энэ төрлийн зээл нийт зээлийн өрийн үлдэгдлийн 5.4 хувь болжээ.

Монголын Ипотекийн корпорац, арилжааны банкнуудаас иргэдэд олгосон ипотекийн зээлийн үлдэгдэл 11.0 их наяд төгрөгт хүрсэн байна. Энэ нь 2024 оны мөн үеийнхээс 21.4 хувиар өсжээ. Ипотекийн зээлийн үлдэгдлийн 97.5 хувь нь хэвийн зээлийн ангилалтай байгаа аж.

Монголбанкнаас зарласан төгрөгийн америк доллартой харьцах сарын дундаж ханш 3571.66 төгрөг болжээ. Төгрөгийн евротой харьцах сарын дундаж ханш 4128.71 төгрөг байна. Мөн төгрөгийн рубльтэй харьцах сарын дундаж 44.42 төгрөг болсон аж, Улмаар төгрөгийн юаньтай харьцах сарын дундаж ханш 502.37 төгрөг байжээ.