Монголбанкны Мөнгөний бодлогын хорооны өчигдрийн хурлаар эдийн засаг, банк, санхүүгийн зах зээлийн байдал, дотоод, гадаад орчны төлөв, эрсдэлийг харгалзан үзээд бодлогын хүүг 12 хувьд хэвээр хадгалахаар болов.
Мөн тэтгэвэр, тэтгэмжийн орлого барьцаалсан зээлийн үлдэгдэлтэй тэнцэх хэмжээний эх үүсвэрийг банкны заавал байлгах нөөц тооцох эх үүсвэрээс хасаж тооцох, тэтгэврийн зээлийн үлдэгдэл хугацааг 36 хүртэл сараар нэг удаа сунгаж, энэ хугацаагаар сарын төлбөрийн дарамтыг багасгасан тохиолдолд уг активыг бүтэц өөрчлөгдсөн активт тооцохгүйгээр ангиллыг хэвээр хадгалах, тэтгэврийн зээлд тогтоосон 150 хувийн эрсдэлийн жингийн хэмжээг 100 хувь болгон багасгахаар шийдвэрлэжээ.
Төв банкны мэдээлснээр, жилийн инфляц энэ оны 11 дүгээр сард улсын хэмжээнд 8.2, Улаанбаатар хотод 8.7 хувьтай гарлаа. Инфляц өмнөх сарынхаас ийнхүү буурахад төрийн зохицуулалттай үйлчилгээний үнийн өсөлтийн суурь нөлөө арилж эхэлсэн нь нөлөөлөв. Гэвч ургац хураалт тааруу байснаас үүдэн хүнсний ногоо, намрын саруудад махны үнэ улирлын хандлагаа дагаж буураагүй нь хүнсний инфляцыг эрчимжүүлсэн бол ирэх оноос цалингийн өсөлт инфляцын төсөөллийг өмнөхөөс нэмэгдүүлнэ. Улмаар инфляц 2026 онд зорилтот интервалд орж тогтворжихоор байна. Түүнчлэн, Засгийн газраас хэрэгжүүлэх төслийн санхүүжилт, экспортын орлого, валютын ханшийн төлөв, цаг агаар болон нийлүүлэлтээс шалтгаалсан үнийн өөрчлөлт нь инфляцыг өдөөж болзошгүй.
Эдийн засаг энэ оны эхний 3 улиралд 5.9 хувиар нэмэгдсэн нь хүлээлттэй нийцтэй байна. Өсөлтийн дийлэнх хэсгийг хөдөө аж ахуй, уул уурхайн салбар бүрдүүлж, цаашдын төлвийг хэвээр хадгаллаа. Өмнөх бодлогын шийдвэр гарсан үеийнхтэй харьцуулахад АНУ-ын тарифын нөлөө шинжээчдийн хүлээлтээс харьцангуй бага байгаагаас дэлхийн болон БНХАУ-ын эдийн засгийн өсөлтийн түвшин нэмэгдсэн, дэлхийн зах зээл дээрх алт, зэсийн үнэ хүлээлтээс их байна. Гэвч гадаад орчны тодорхой бус байдал хэвээр байгаа.
Бодлогын хүүг хэвээр хадгалах, төгрөгийн заавал байлгах нөөцийн хувь хэмжээг багасгах шийдвэр нь инфляцыг дунд хугацаанд зорилтот түвшинд тогтворжуулах, эдийн засаг, санхүүгийн салбарын тогтвортой байдлыг бэхжүүлэх зорилттой нийцтэй болно. Энэ шийдвэр нь банкны зээлийн эх үүсвэрийн өртгийг багасгахад чиглэсэн арга хэмжээ юм. Түүнчлэн, тэтгэврийн зээлийн сарын төлбөрийн дарамтыг багасгахаар боломжит бодлогын хувилбаруудыг хэлэлцэж, шийдвэрлэжээ.
