Хятад улс олон улсын төлбөр тооцоог дижитал хэлбэрт шилжүүлэх зорилгоор e-CNY буюу дижитал юаньд суурилсан “Renminbi Digital” системээ бүрэн ашиглаж эхэллээ. Энэ нь банк хоорондын уламжлалт тогтолцоог орлох, долларт тулгуурлалгүй тооцоо хийх боломжийг нэмэгдүүлэх стратегийн чухал алхам гэж үзэж байна. Шинэ системийг Зүүн өмнөд Ази, Ойрхи Дорнод, Орос болон Тусгаар тогтносон орнуудын холбооны зарим улс орнууд ашиглаж эхлээд байна.

Дижитал юань нь Хятадын Ардын банкны баталгаатай, үндэсний мөнгөн тэмдэгтийн ижил үнэ цэнэ, ижил эрх зүйн хүчтэй хувилбар бөгөөд Төв банкнаас гарсан нэгжүүдийг тусгай зөвшөөрөлтэй санхүүгийн байгууллагуудаар дамжуулан хэрэглээнд түгээдэг хоёр төвшний загвараар ажилладаг. Энэхүү валют нь бэлэн мөнгөний хуурамч хуулбарыг зогсоох, мөнгөн гүйлгээг ил тод болгох, гадаад орнуудтай тооцоог илүү хурдтай, шууд хийх боломжийг олгож байна.

Renminbi Digital-ийг ашигласан гадаад төлбөр тооцооны хэмжээ энэ жил 90 тэрбум ам.доллараас давсан нь дижитал мөнгөний хэрэглээ хурдацтай тэлж буйг харуулж байна. Гэхдээ уг систем нь одоогоор SWIFT-ийг бүрэн орлох хэмжээнд хүрээгүй ч олон байгууллага Хятадтай доллар ашиглалгүй харилцан тооцоо хийх практик хэрэгсэл болгон ашиглаж эхэлжээ.

Дижитал валют нь криптовалютаас ялгаатайгаар Төв банкны баталгаатай, үнэ тогтвортой, хууль ёсны төлбөрийн хэрэгсэл бөгөөд үйл ажиллагаа нь төрийн санхүүгийн дэд бүтцээр хамгаалагддаг.

ОХУ мөн адил дижитал рублийг хөгжүүлж байна. Туршилт 2023 оноос эхэлсэн бөгөөд 150 гаруй хот сууринд 2,500 орчим дижитал түрийвч нээж, 100 мянга гаруй ажиллагаа хийгджээ. 2025 оны долдугаар сард батлагдсан хуулиар 2026 оны есдүгээр сараас дижитал рублийг шат дараатайгаар нэвтрүүлэхээр болж, банкууд болон өндөр орлоготой иргэд QR суурьтай төлбөрийн системд бүрэн шилжихээр бэлтгэж байна.

Эх сурвалж: Izvestia