Их Британи эдийн засгийн хямралын өмнөх шатанд орж, улмаар Ерөнхий сайд Кир Стармерын засгийн газрын рейтинг огцом буурахад хүрчээ. Сүүлийн хөрөнгө оруулалт, өсөлтийн үзүүлэлтүүд саарч, эдийн засаг III улиралд ердөө 0.1 хувь өссөн нь эдийн засагчдын санааг зовоож байна. Ажлын байрны бууралт 2020 оноос хойших хамгийн доод түвшинд хүрч, ажилгүйдэл 5 хувь болов. Инфляц зорилтот 2 хувиас давж 3.8 хувьд хүрсэн нь мөн эдийн засгийг дарамтанд оруулж байгаа аж.

Европын холбооноос гарсан шийдвэр болон ОХУ-д тавьсан хоригийн бодлого нь Их Британийн худалдаа, хөрөнгө оруулалтын орчныг доройтуулах шалтгаан болжээ. Европын 400 сая хэрэглэгч бүхий зах зээлд нэвтрэх боломж хумигдсанаар эдийн засгийн өрсөлдөх чадвар суларч байна.

Эдийн засгийн ийм нөхцөлд Стармерын засгийн газар төсвийн орлогыг нэмэхийн тулд татвар өсгөх бодлого баримталж буй. Өнгөрсөн жилд 40 тэрбум фунтын татвар нэмэгдүүлсэн бол ирэх оны төсөлд дахин 26 тэрбум фунт нэмэхээр тусгажээ. Ингэснээр татварын дарамт ДНБ-ний 38 хувь болж, тус улсын түүхэн дэх хамгийн өндөр түвшинд хүрээд байна. Засгийн газар ажлын анги руу чиглэсэн татвар нэмэхгүй гэж амласан ч нэмүү өртгийн татварын босгыг царцааснаар олон өрх татварын хөнгөлөлтөө алдаж эхэлжээ.

Мөн ашгийн татвар, хадгаламжийн татвар, цахилгаан машины гүйлтийн татвар зэрэг нэмэлтүүдээр иргэдэд болон бизнесүүдэд дарамт улам нэмэгдэх төлөвтэй. 2031 он гэхэд хөдөлмөр эрхэлэгчдийн 25 хувь нь 40 хувийн татварын ангилалд орох эрсдэлтэй байна.

Төсвийн энэ бодлогын улмаас Стармерын дэмжлэг буурч, түүний чансаа 13 хувьд хүрч уналаа. Шинжээчдийн үзэж байгаагаар татварын өндөр дарамт нь хөрөнгө оруулалтын орчныг муутгаж, Их Британи Европын эдийн засгийн өсөлтөөр хамгийн удаан хөгжилтэй улсуудын жагсаалд орох эрсдэлтэй болж байна.