“Монгол-Оросын бүс нутгийн анхдугаар чуулга уулзалт” Эрхүү хотноо болж байна.

ЭЗХЯ-ны мэдээлснээр, чуулга уулзалтаар 11 салбар, чиглэлийн 72 төсөл, үйл ажиллагааг багтаасан “Монгол Улс, ОХУ-ын бүс нутгийн хамтын ажиллагааг хөгжүүлэх 2026-2030 оны дунд хугацааны хөтөлбөр”-ийг баталсан гэдгийг Монгол Улсын Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр, ОХУ-ын Засгийн газрын орлогч дарга А.Л.Оверчук нар зарлалаа.

Тэргүүн шадар сайд бөгөөд Эдийн засаг, хөгжлийн сайд Ж.Энхбаяр энэ талаар, “Хоёр улсын худалдааны тэнцлийн зөрүүг бууруулж, харилцан ашигтай хамтын ажиллагааг хөгжүүлэх талаар талууд идэвхтэй ажиллаж, Монгол Улс Евразийн эдийн засгийн холбоо, түүний гишүүн орнуудтай худалдааны түр хэлэлцээрийг байгуулсан. Энэхүү хэлэлцээр нь зөвхөн тарифын зохицуулалт бус, бизнесийн байгууллагуудын хамтын ажиллагааг өргөжүүлэх, хил гаалийн түвшний хүндрэлүүдийг бууруулах, хөрөнгө оруулалтын урсгалыг нэмэгдүүлэх бодит хэрэгцээг хангаж байна. Өнөөдрийн хэлэлцүүлэг, уулзалтууд нь бизнес эрхлэгчид болон бүс нутгийн удирдлагуудад шинэ түншлэл тогтоох, харилцан ашигтай хамтарсан төслүүдийг эхлүүлэх өргөн боломж олгож буйгаараа онцлог юм. Монгол Улс, ОХУ-ын бүс нутгууд дэд бүтэц, тээвэр, логистикийн чиглэлд уялдаа холбоогоо сайжруулж, харилцан ашигтай боломжийг бодит ажил хэрэг болгон хэрэгжүүлэхийн тулд илүү нягт хамтран ажиллах нь зүйтэй” хэмээн онцлон тэмдэглэв.

“Монгол-Оросын бүс нутгийн анхдугаар чуулга уулзалт” хүрээнд “Монгол, Оросын худалдаа, аж үйлдвэрийн хамтын ажиллагааны боломжийг нээх нь”, “Монгол Улс болон ОХУ-ын бүс нутгуудын Евразийн орон зайд нэгдсэн харилцааг хөгжүүлэхэд гүйцэтгэх үүрэг”, “Монгол, Оросын аялал жуулчлалын боломжийг хөгжүүлэх нь” зэрэг сэдвүүдээр танилцуулга хийж, асуулт хариултын хэлбэрээр хэлэлцүүлэг өрнүүлэв.

Чуулга уулзалтын үеэр B2B /бизнес эрхлэгч хоорондын/ уулзалтууд болж, хоёр улсын төр, хувийн хэвшлийн 250 гаруй төлөөлөгч оролцжээ.