Монгол Улс 2019 онд олон улсын санхүүгийн хориг арга хэмжээний байгууллага болох Эй Пи Жи-ээс (APG) стратегийн дутагдалтай улс гэж үнэлэгдэж, саарал жагсаалтад багтаж байсан ч нэг жилийн хугацаанд шаардлагуудыг биелүүлж жагсаалтаас гарч байсан. Тухайн үеийн амжилт нь төрийн бодлогоос гадна бүх салбарын хамтын ажиллагааны үр дүн гэж мэргэжилтнүүд онцолж байна.
2028 онд ФАТФ-аас манай улсыг дахин шалгахаар төлөвлөсөн бөгөөд үүнд бэлтгэх зорилгоор төрийн болон санхүүгийн байгууллагууд үйл ажиллагаагаа бүрэн цахимжуулах, хяналтын тогтолцоог шинэ шатанд гаргах шаардлагатай болжээ. 2020 онд шинэчилсэн хууль, журмууд өнөөдөр хэрхэн хэрэгжиж байгаа болон цаашид ямар сайжруулалт хийх шаардлагатайг тодорхойлох нь үнэлгээний гол хэсэг болохыг салбарынхан хэллээ.
Форумын үеэр цахим залилан, хуурамч зээл, кибер халдлага зэрэг иргэдийн дунд түгээмэл болсон эрсдэлүүд өсөн нэмэгдэж байгааг онцоллоо. Зарим тохиолдолд иргэд болон банкны данс руу хууль бусаар нэвтэрч, гүйлгээ хийх гэмт хэрэг бүртгэгдэж байгаа нь хяналтын системийг шинэчлэх хэрэгцээг улам тодотгож байна.
Банк санхүүгийн байгууллагууд болон санхүүгийн бус мэргэжлийн үйлчилгээ үзүүлэгчид эрсдэлийн үнэлгээг сайжруулж, эмзэг цэгүүдийг тодорхойлж, стратегийн баримт бичигт тусгах нь чухал гэдгийг оролцогчид тэмдэглэв. Мөн хууль эрх зүйн орчныг шинэчилж, технологид суурилсан хяналтын шийдлийг өргөжүүлэх шаардлагатайг хэлэлцсэн байна.
Эцэст нь Монгол Улс бүс нутагтаа санхүүгийн сахилга бат, тайлагнал, хяналтын тогтолцоогоороо жишиг улс болох зорилттой байгааг форумын үеэр тодотголоо.
