Xiaomi компанийн авто үйлдвэрлэл болон хиймэл оюуны чиглэлийн бизнес 2025 оны гуравдугаар улиралд нийт 98 сая ам.долларын ашигтай ажилласан талаар Bloomberg мэдээллээ. Компанийн SU7 цахилгаан автомашин анх үйлдвэрлэгдсэнээс хойш 19 дэх сар хүртэл алдагдалгүй үр дүн гаргасан нь цахим үйлдвэрлэгчдийн дундах ховор жишээ болж байна.

Xiaomi-гийн ерөнхий захирал Лэй Цюний мэдээлснээр компани 350 мянган цахилгаан автомашин нийлүүлэх зорилгодоо хүрсэн бөгөөд дараагийн зорилт нь 500 мянгад хүргэх явдал аж. Энэ онд л гэхэд 400 мянга гаруй автомашин нийлүүлэх төлөвтэй байна.

Xiaomi анхны цахилгаан автомашин SU7-гаа 2024 оны гуравдугаар сарын сүүлээр үйлдвэрлэлийн шугамаас гаргасан бөгөөд худалдаа эхэлснээс ердөө 27 минутын дараа 50 мянган захиалга авсан нь анхны эрэлт тун өндөр байсныг харуулдаг. Цахилгаан автомашины салбарын компаниуд ихэвчлэн олон жил алдагдалтай ажиллаж байж ашигт ажиллагаанд хүрдэг. Жишээлбэл, Tesla 2008 онд Roadster загвараа танилцуулсан ч 2013 онд л анхны улирлын ашгаа үзсэн бол Хятадын Li Auto хоёр жилийн дараа ашигтай ажиллаж эхэлсэн байдаг.

Харин Xiaomi цахилгаан автомашины зах зээлд орохдоо илүү богино хугацаанд ашигт хүрсэн нь компанийн бүтэц, технологийн нөөц, хэрэглэгчийн өргөн бааз, мөн зөвхөн ганц загвар дээр төвлөрөн хөгжүүлсэн стратегитэй холбоотой гэж шинжээчид үзэж байна. Одоогоор цахилгаан автомашины бизнес нь Xiaomi-гийн нийт борлуулалтын 25 хувийг эзэлж байна.

Эх сурвалж: Office life